Ҳиндистонда Air India авиакомпанияси йўловчи самолёти учувчилардан бири гиёҳвандлик моддаси таъсирида бўлгани туфайли ҳалокатга учрашига бир бахя қолди.
Ҳодиса 4 август куни рўй берган. The Times of India газетаси ёзишича, Таиланднинг Пхукет шаҳридан Ҳиндистон пойтахти Ню Деҳли шаҳрига парвоз қилган Airbus A320neo самолёти командири кутилмаганда ўзини ёмон ҳис қила бошлаган ва унга борт кузатувчиси томонидан тез тиббий ёрдам кўрсатилган.
Бу вақтда лайнер баландликни йўқотиб, кескин пастлаган.
Салондан олинган видеоларда юкхоналар эшиги очилиб, буюмлар сочилиб кетгани, айрим йўловчилар шикастланганини кўриш мумкин.
Самолёт аэропортга қўнганидан кейин 20 йўловчи ва экипажнинг тўрт нафар аъзоси тиббий ёрдам сўраб мурожаат қилган, 17 киши шифохонага ётқизилган.
Аввалига авиакомпания раҳбарияти ҳодисанинг асл сабабини яширишга уринган ва бу ҳолатга самолёт турбулентлик зонасига тушиб қолгани сабаб бўлганини билдирган. Аммо текширувлар давомида самолётнинг биринчи учувчиси мариҳуана қабул қилгани аниқланган. Ўтказилган тест унинг организмида гиёҳвандлик моддаси борлигини тасдиқлаган.
Қайд этилишича, бу вазиятда фақат иккинчи учувчи бошқарувни ўз қўлига олгани ва белгиланган манзилга олиб боргани самолётни авиаҳалокатдан сақлаб қолган.
