ТАСС агентлигининг 24 август куни блогернинг адвокати Сергей Бадамшинга таяниб хабар беришича, Иля Ремесло Россия армияси ҳақида «фейк» тарқатиш бўйича жиноят иши доирасида ўтказилган тиббий экспертизадан кейин Москвадаги 7-сонли, «Капотня» номи билан ҳам танилган тергов ҳибсхонасига ўтказилган.
Бунга қадар Ремесло июл ойи охиридан бери Сербский номидаги психиатрия институтида суд-психологик ва психиатрик экспертизадан ўтаётган эди. Экспертиза натижалари ҳозирча очиқланмаган.
Блогер камида 16 сентябрга қадар тергов изоляторида қолиши кутилмоқда. Шу вақтда Москвадаги Басман суди унга нисбатан қўзғатилган жиноят ишини кўриб чиқишга тайёргарлик кўради. Айблов бўйича Ремеслога 10 йилгача қамоқ жазоси берилиши мумкин.
Йиллар давомида Путинни қўллаб-қувватлаган
Иля Ремесло Россия Жамоат палатасининг собиқ аъзоси. Бироқ у жамоатчилик орасида асосан Россия мухолифати ва фаолларига қарши мурожаатлари билан танилган.
Хусусан, Ремесло Алексей Навалний ва Коррупцияга қарши кураш фонди (КҚКФ)нинг узоқ йиллик танқидчиларидан бири бўлган. У бу фаолияти билан Россия Жамоат палатасига тайинланишидан олдин ҳам танилган эди.
Навалнийнинг 2017 йилги президентлик кампанияси учун йиғилган хайрия маблағлари билан боғлиқ фирибгарлик иши айнан Ремеслонинг мурожаатидан кейин қўзғатилгани айтилмоқда. Кейинчалик унинг яна бир мурожаати Навалнийга нисбатан россиялик фахрийни ҳақорат қилиш бўйича жиноят иши очилишига асос бўлган.
Путинни «ноқонуний президент» деб атади
2026 йил март ойида Ремесло кутилмаганда ўзининг Telegram-каналида Владимир Путин ҳамда Россиянинг Украинага қарши уруши ҳақида кескин танқидий постлар эълон қилди.
У Путинни ҳокимиятни ўзлаштириб олишда айблаб, уни «ноқонуний президент», шунингдек, «ҳарбий жиноятчи ва ўғри» деб атаган.
Бу баёнотлар Ремеслонинг аввалги сиёсий позициясидан кескин фарқ қиларди. Чунки у узоқ йиллар давомида Путин ҳокимиятини қўллаб-қувватлаб келган ва Россия мухолифатига қарши фаол ҳаракат қилган.
Танқидий постлардан икки кун ўтиб психиатрия шифохонасига тушди
Путинни танқид қилган постлар эълон қилинганидан икки кун ўтиб Ремесло психиатрия шифохонасига ётқизилган. Айрим маълумотларга кўра, унинг шифохонага тушишига блогернинг синглиси ҳам аралашган.
