Рўйхат тузувчиларининг қайд этишича, 2026 йилги рўйхат «бу соҳанинг жадал ривожланаётган ҳолатини акс эттиради» – унда соҳадаги энг йирик компаниялар асосчилари ва СИ тадқиқотчилари билан бир қаторда, ушбу технологиянинг у ёки бу жиҳатларини фаол танқид қилувчилар ҳам бор. Time сунъий интеллект соҳасидаги энг нуфузли шахслар рўйхатини 2023 йилдан бери эълон қилиб келади.
Time рўйхатдаги барча иштирокчиларни тўртта тоифага ажратди. Биринчи, «етакчилар» тоифасига, хусусан, OpenAI ҳаммуассиси Сэм Альтман, SpaceX бош директори Илон Маск, Anthropic асосчилари Дарио ва Даниэла Амодеи, Amazon асосчиси Жефф Безос кирди.
Иккинчи, «инноваторлар» тоифаси иштирокчилари орасида америкалик актёр, режиссёр ва кинода сунъий интеллектни қўллашга мўлжалланган InterPositive стартапининг яратувчиси Бен Аффлек ҳамда Хитойнинг Moonshot AI компанияси асосчиси Ян Чжилин бор.
Учинчи тоифа — «СИ соҳасини шакллантирувчилар» (shapers). Бу рўйхатдан актриса Пэрис Ҳилтон (дипфейкларга қарши кураши учун), америкалик сиёсатчи Берни Сандерс (сунъий интеллектнинг меҳнат бозорига ва умуман жамиятга салбий таъсирини танқид қилгани учун), инвестор ва АҚШ президентининг фан ва технологиялар бўйича маслаҳатчилар кенгаши ҳамраиси Дэвид Сакс ўрин олган.
Тўртинчи, «мутафаккирлар» тоифасига, жумладан, OpenAI ҳаммуассиси ва хавфсиз суперинтеллектни ривожлантиришга қаратилган Safe Superintelligence стартапи яратувчиси Иля Суцкевер, сунъий интеллектни ишлаб чиқиш ва унинг инсон билан ҳамкорлигига йўналтирилган Thinking Machines стартапи асосчиси Мира Мурати ҳамда Nvidia корпорациясининг барқарорлик бўйича директори Жош Паркер киритилди.
