AGI (Artificial General Intelligence) — умумий сунъий интеллект тушунчаси бўлиб, одатда инсонга хос кенг доирадаги когнитив вазифаларни бажариш ва янги билимларни ўзлаштириш имкониятига эга сунъий интеллект тизимларини ифодалаш учун қўлланади.
OpenAI бош директори Сэм Алтманнинг фикрича, бундай технологиянинг илк кўринишлари 2026 йил охирига қадар пайдо бўлиши мумкин.
Альтман TIME журналида чоп этилган материалда OpenAI компаниянинг ўзи AGI деб ҳисоблайдиган мезонларга мос ички тизимни яратишни режалаштираётганини айтган.
Шу билан бирга, ҳозирча умумий сунъий интеллектнинг барча мутахассислар томонидан қабул қилинган ягона таърифи мавжуд эмас.
OpenAI AGIʼни иқтисодий аҳамиятга эга бўлган аксарият фаолият турларида инсонлардан устун бўла оладиган юқори даражада автоном тизимлар сифатида таърифлайди.
Компания вакиллари AGIʼни яратиш йўлида сезиларли натижаларга эришилганини билдирмоқда. OpenAI бош илмий ходими Марк Ченнинг баҳосига кўра, компания AGI яратиш мақсадига тахминан 80 фоиз яқинлашган.
OpenAI ҳаммуассиси ва президенти Грег Брокман эса компания ўз режаларини амалга ошира олса, келажакда 2026 йил охири AGI пайдо бўлган давр сифатида баҳоланиши мумкинлигини айтган.
Компания бу йўналишдаги истиқболли ишланмаларидан бири сифатида келажакдаги Astra моделлари линейкасини кўрсатмоқда.
OpenAI бош илмий ходими Якуб Пахоцкининг таъкидлашича, Astra тадқиқотга оид вазифаларни ҳозирнинг ўзида стажёр даражасида бажара олади.
Алтман эса мижозларнинг бир гуруҳига моделнинг дастлабки версияси намойиш этилган тадбирда Astra янги ва аҳамиятли нарсаларни ихтиро қилишга қодир бўлган биринчи модель бўлиши мумкинлигини айтган.
Унинг фикрича, бундай қобилиятлар тизимни AGI тушунчасига жуда яқинлаштиради.
Бироқ OpenAIʼнинг ушбу баёнотлари ҳозирча мустақил равишда тасдиқланмаган. Компания Astra имкониятлари батафсил баён қилинган техник ҳисоботни ҳам ҳали эълон қилмаган.
Шу сабабли AGI 2026 йил охиригача яратилиши ҳақидаги баҳо ҳозирча OpenAI раҳбарлари ва мутахассисларининг прогнозлари бўлиб қолмоқда.
