Defence Blog хабарига кўра, реставрация қилинган вертолёт ҳозир МРБнинг Лэнглидаги бош қароргоҳи ҳудудида сақланмоқда. У 2001 йил 26 сентябрда, АҚШдаги 11 сентябр терактларидан 15 кун ўтиб, разведкачилар гуруҳини Панжшер водийсига етказган.

JAWBREAKER гуруҳига тажрибали разведка ходими Гэри Шроен раҳбарлик қилган. У янги операцияда қатнашиш учун пенсияга чиқишини кечиктирган.

Бортда МРБнинг етти ходими, уч нафар экипаж аъзоси ва икки афғонистонлик ҳамкор бўлган. Уларнинг вазифаси Шимолий алянс билан алоқа ўрнатиш ҳамда «Ал-Қоида» ва толибларга қарши кейинги АҚШ ҳарбий кампанияси учун шароит тайёрлашдан иборат эди.

Ми-17нинг кўриниши эътибор тортмаган

Совет конструкциясидаги вертолётни танлашнинг амалий сабаби бўлган: бундай машиналар Афғонистон ва минтақада аллақачон ишлатилган. Шунинг учун унинг пайдо бўлиши ғайриоддий кўринмаган.

МРБ мазкур вертолётни 1990-йилларда сотиб олган. Бироқ уни одамлар ва юклар билан тоғлар оша олиб ўтиш экипаж учун мураккаб вазифа бўлган.

Панжшерга йўналиш Ҳиндикушдаги баландлиги қарийб 4 400 метр бўлган Анжуман довони орқали ўтган. Вертолётда йўловчилардан ташқари қурол, ўқ-дори, ёнилғи ва ускуналар ҳам бўлган.

Гэри Шроен 2019 йилда экспонатнинг очилиш маросимида довон олдидан баландликка кўтарилиш пайтида вертолёт қаттиқ силкинганини эслаган.

«Руслар уни ташқи кўриниш ва услуб учун эмас, ишлаш ва хизмат қилиш учун қурган», — деган у.

Кабинадаги ёзувлар қўлда таржима қилинган

Вертолёт Америка разведкаси вазифаларига мослаб қайта жиҳозланган. МРБ музейи каталогига кўра, унга янги авионика ўрнатилган.

Айрим ўзгаришлар эса анча содда бўлган: кабинадаги кириллча ёзувлар устига қалам билан инглизча таржималар ёзилган. Бу экипажнинг бошқарув воситаларига тезроқ мослашишига ёрдам берган.

Вертолётда радиоалоқа ва фавқулодда радиомаяк бўлган, аммо транспондер — идентификация сигналини узатувчи қурилма бўлмаган.

АҚШ ва коалиция кучлари уни кўриб таниши учун дум қисмининг горизонтал юзасига USA ёзуви ва Америка байроғи тасвири туширилган. Кўк бўёқ топилмагани сабабли байроқнинг фақат қизил ва оқ чизиқлари чизилган.