Европарламентнинг 6 октябрдаги хабарига кўра, ташаббусни 536 депутат қўллаб-қувватлаган. 101 депутат қарши овоз берган, 16 нафари бетараф қолган.
AGILE — тезкор мудофаа инновацияларини қўллаб-қувватлаш дастури — янги технологияларни яратаётган корхоналарга тез ва мақсадли молиявий ёрдам беришга қаратилган. Ундан стартаплар, шунингдек, фаолиятини кенгайтираётган компаниялар ҳам фойдаланиши кўзда тутилган.
Дастур мудофаа соҳасидаги ишланмаларни яратиш, синовдан ўтказиш ва бозорга олиб чиқиш жараёнини тезлаштириши керак. Бунинг учун грантлар ажратиш тартибини жадаллаштириш, синов ва сертификатлаш имкониятларидан фойдаланишни енгиллаштириш режалаштирилган.
ЕИга аъзо давлатлар дастур доирасида ҳал қилиниши керак бўлган вазифаларни белгилашда иштирок эта олади. Шу орқали ишлаб чиқилаётган маҳсулотларни қуролли кучларнинг амалий эҳтиёжларига мослаштириш кўзланган.
ЕИнинг технологиялар бўйича комиссари Ҳенна Вирккунен аввалроқ AGILE Европанинг энг ижодкор технологик компанияларини мудофаа саноати билан яқинлаштириши кераклигини айтган эди.
Мудофаа бўйича комиссар Андрюс Кубилюс эса уруш олиб бориш усуллари кескин ўзгараётганини таъкидлаб, қуролли кучларга янги технологиялар, тезкор етказиб бериш ва рақобатбардош нархлар зарурлигини билдирган.
Европарламент ва ЕИ кенгаши музокарачилари дастур бўйича дастлабки келишувга 2026 йил июлда эришган. Энди ҳужжат ЕИ кенгаши томонидан маъқулланиб, расмий журналда эълон қилиниши лозим.
