Tramp Soipovni «nosog‘lom hayvon» deb atadi

AQSh prezidenti Donald Trampning ma'lum qilishicha, IShID terrorchilari Nyu-Yorkda sodir etilgan va sakkiz kishining o‘limiga sabab bo‘lgan terakt uchun yuqori narx to‘laydi.

«IShID Vest-Saydda ajoyib kishilarni o‘ldirgan va og‘ir jarohat yetkazgan nosog‘lom hayvon o‘z askari bo‘lgani haqida ma'lum qildi. Shu sababdan, bizning harbiylarimiz so‘nggi ikki kun ichida IShIDga zarbalarni ko‘paytirishdi. Ular bizga amalga oshirilgan istalgan hujum uchun katta narx to‘laydilar!» - deya yozgan Tramp Twitter’da.

Avvalroq Nyu-Yorkdagi terakt uchun mas'uliyatni IShID o‘z zimmasiga olgani xabar berilgandi.

Soipovga IShIDni qo‘llab-quvvatlash bo‘yicha ayblov qo‘yildi

31 oktabr, seshanba kuni Manhettenda yuk mashinasini boshqargan shaxs odamlarni qasddan urib yuborishi oqibatida 8 kishi halok bo‘ldi, 12 kishi jarohatlandi. Teraktni sodir etishda gumon qilinayotgan shaxs kelib chiqishiga ko‘ra o‘zbekistonlik Sayfullo Soipovdir.