Ahror Sodiqovning ma'lum qilishicha, ijtimoiy tarmoqlarda tarqalgan xabarlar to‘g‘ri. Haqiqatan ham Xalq deputatlari viloyat Kengashining joriy yil 2 noyabr kuni o‘tkazilgan navbatdagi sessiyasida bir qator qaror loyihalari tasdiqlangan.
Ular orasida Qarshi shahar hokimligi balansidagi sobiq harbiy gospital binosini O‘zbekiston ekologik partiyasi Qashqadaryo viloyat kengashiga moslab va viloyat hokimligi ma'muriy binosining tashqi fasadini kapital ta'mirlashni nazarda tutuvchi qaror loyihalari ham bo‘lgan.
Joriy yil 8 noyabr kuni viloyat hokimi «O‘zbekiston Ekologik partiyasi Qashqadaryo viloyat kengashi binosini kapital ta'mirlash ishlari bilan bog‘liq xarajatlarga mablag‘ ajratish to‘g‘risida»gi va «Viloyat hokimligi ikkinchi ma'muriy binosi fasadini kapital tamirlash ishlari bilan bog‘liq xarajatlarga mablag‘ ajratish to‘g‘risida»gi qarorlarni imzolagan.
Yuqoridagi qarorlar bo‘yicha viloyat «Yagona buyurtmachi xizmati injiniring» kompaniyasiga viloyat mahalliy budjetining 2021 yil III chorak daromadlar rejasining oshirib bajarilgan qismi hisobidan sobiq harbiy gospital binosini ta'mirlash uchun 360 million so‘m, viloyat hokimligi ikkinchi ma'muriy binosi fasadini kapital ta'mirlash uchun 215 million so‘m ajratish belgilangan.
