«Ukrainadagi har kungi reallik» va Baxmutda okop qaziyotgan jangchilar. Urush suratlari

Ukrainada urushning 343-kuni o‘tdi. Asosiy ma’lumotlar: 

• Rossiya qo‘shini Kramatorsk shahri markazini o‘qqa tutdi. Raketa turar joy binosini vayron qilgan, tinch aholi vakillaridan uch kishi halok bo‘lib, yana 18 kishi jarohatlangan. Prezident Zelenskiy Kramatorsk o‘qqa tutilishi oqibatlarini «mamlakatning har kungi realligi» deb atadi.
• AQSh Ukrainaga 150 kilometr masofaga harakatlanuvchi GLSDB (Ground Launched Small Diameter Bomb) raketalarini taqdim etadi. Raketalar 2 milliard dollarlik yangi harbiy yordam paketida bo‘ladi, bu haqda shu kunlarda e’lon qilinishi kutilmoqda.
• Ukrainaga Avstriya prezidenti Aleksandr Van der Bellen tashrif buyurdi. U Buchada bo‘ldi va Kiyevda Volodimir Zelenskiy bilan uchrashdi. Van der Bellen Avstriyaning neytral maqomi va Qurolli kuchlar budjetidagi tejamkorlik siyosati Avstriya Ukrainaga qurol yetkazib berishiga imkon bermasligini, shu bilan birga ushbu mamlakat «urushni yakunlashning barcha diplomatik yo‘llarini qo‘llab-quvvatlashi»ni bildirdi.
• Yevgeniy Prigojin «Vagner» XHK jangchilari Donetsk oblastining uch kishi yashovchi Sakko va Vansetti qishlog‘ini egallaganini ma’lum qildi. Rossiya mudofaa vazirligi va Ukraina hukumati bu bayonotga munosabat bildirmagan.
• AQSh Amerika-Rossiya investitsiya fondidan Ukrainani qo‘llab-quvvatlash uchun 135 million dollar ajratdi.

Kramatorsk markaziga zarba 

1 fevral kuni kechqurun Rossiya qo‘shini Ukraina nazoratidagi Kramatorsk shahriga zarba yo‘lladi. Ukraina milliy politsiyasiga ko‘ra, shahar markazida kamida sakkizta ko‘p qavatli uylar shikastlangan. Uch kishi halok bo‘lib, 18 kishi yaralangani ma’lum.

Volodimir Zelenskiy ushbu hodisa aybdorlariga «shafqat qilinmasligi»ni ma’lum qildi. RF mudofaa vazirligi hozircha ushbu shahar bo‘ylab berilgan zarbalarga munosabat bildirmadi. Quyida ushbu hujum oqibatlari aks etgan kadrlar.

Ukraina qurolli kuchlari Baxmut atrofida mudofaa liniyalari hozirlamoqda

RF armiyasining Donetsk oblasti Baxmut shahriga yurishi davom etmoqda. The New York Times nashri yozishicha, Rossiya qo‘mondonligi jang olib borish taktikasini o‘zgartirgan. Yozda RF qo‘shini Baxmut va uning atrofidagi hududlarni avvaliga haftalar davomida o‘qqa tutib, keyin shturm qilgan bo‘lsa, endi 2022 yil 21 sentabrida e’lon qilingan safarbarlik doirasida urushga jalb qilinganlardan iborat ko‘p sonli piyodalar bilan bostirib kelmoqda. Shu bilan birga, Ukraina tomoniga ko‘ra, rossiyaliklar avvalgi oylar bilan solishtirganda ko‘proq yo‘qotishlarga uchramoqda.

Donbass frontidagi ukrainalik zenitchilar 

Xarkiv oblastida eksgumatsiya jarayoni 

Xarkivda vayron bo‘lgan bolalar bog‘chasidagi o‘yinchoqlar

Chernihiv oblastida blekaut