O‘zbekistonda joriy yil sentabr oyigacha gaz va elektr narxlarini liberallashtirish dasturi taqdim etiladi. Bu haqda Gazeta.uz'ga energetika vazirining birinchi o‘rinbosari Azim Ahmedxo‘jayev ma’lum qildi.
Uning so‘zlariga ko‘ra, bu dastur orqali energiya narxlarini liberallashtirish hamda ijtimoiy iste’mol normalarini joriy etish rejalashtirilyapti.
“Energiyani ko‘p iste’mol qiluvchi korxonalar faoliyati samaradorligini oshirish, shuningdek, uzoq muddatli maqsadlarni belgilash maqsadida energiya xarajatlarini kamaytirish va ularni turli tariflarga bo‘lishni istaymiz, chunki hozirda har bir korxona uchun gaz va elektr energiyasiga bitta tarif belgilangan. Shuning uchun biz ularni ajratib, O‘zbekistondagi har bir sub’yekt, har bir biznes va jamiyat qatlamiga alohida yondashmoqchimiz”, – degan Azim Ahmedxo‘jayev.
U hukumatning asosiy maqsadlaridan biri elektr energetika sohasining samarali ishlashi va o‘sishi yo‘lidagi to‘siqlarni bartaraf etishdan iboratligini ta’kidlagan.
Azim Ahmedxo‘jayevning qo‘shimcha qilishicha, Energetika vazirligi xalqaro moliya institutlari va boshqa tashkilotlar bilan birgalikda kelajakdagi islohotlar uchun asos bo‘ladigan butun tarmoq uchun yangi me’yoriy-huquqiy bazani ishlab chiqyapti.
“O‘zbekistonda raqobatbardosh elektr energiyasi bozoriga o‘tish uchun asoslarni tayyorlayapmiz. Hozirda dastur ustida ishlayapmiz, unga ko‘ra, hududlarga elektr energiyasini tashish bo‘yicha xorijiy kompaniyalar va xorijiy tajribani jalb qilamiz. Elektr energiyasini ishlab chiqarish va yakuniy iste’molchiga yetkazishda yangicha yondashuvni ko‘rsata oladigan yaxshi boshqaruvchi kompaniyalarni jalb qilmoqchimiz”, – dedi u.
Shu maqsadda mustaqil regulyator tashkil etiladi va u bozor asosida tariflarni hamda energiya ishlab chiqaruvchisi va iste’molchi o‘rtasidagi munosabatlarni tartibga soladi. Ahmedxo‘jayevga ko‘ra, vazirlik bu borada Ozarboyjon tajribasini o‘rganmoqda, u sinovdan o‘tkazilgandan keyin regulyator mustaqil ishlashi mumkin.
Eslatib o‘tamiz, gaz va elektr energiyasi tariflari oxirgi marta 2019 yil avgust oyida ko‘tarilgan.
O‘tgan yili 1 iyuldan aholi uchun bazaviy tariflarni 10 foizga oshirib, tabaqalashtirilgan tariflarga o‘tish rejalashtirilgan
