Tumanning oldingi hokimi San’atillo Hikmatov Navoiy viloyati hokimiga o‘rinbosar bo‘lib ketgandi.
Xalq deputatlari Jondor tumani kengashining navbatdan tashqari sessiyasi bo‘lib o‘tdi. Bu haqda Buxoro viloyati hokimligi xabar bermoqda.
Sessiyada tashkiliy masala ko‘rildi. Viloyat hokimi Botir Zaripov San’atillo Hikmatov boshqa ishga o‘tishi munosabati bilan Jondor tumani hokimi lavozimidan ozod etish to‘g‘risidagi qarorni o‘qib eshittirdi.
O‘z navbatida, Jamshid Xudoyevni Jondor tumani hokimi etib tayinlash to‘g‘risida viloyat hokimining qarori qabul qilingani deputatlarga ma’lum qilindi. Jamshid Xudoyevni Jondor tumani hokimi etib tayinlash to‘g‘risidagi qaror deputatlar tomonidan ma’qullandi.
Jamshid Xudoyev 1983 yilda Jondor tumanida tug‘ilgan. 2004 yilda Toshkent davlat yuridik institutini va 2009 yilda Buxoro davlat universitetini bitirgan. Mutaxassisligi – huquqshunos va iqtisodchi.
J.Xudoyev mehnat faoliyatini Bosh prokuratura huzuridagi Soliq va valutaga oid jinoyatlarga qarshi kurashish departamentining Qorovulbozor tumani bo‘limi surishtiruvchiligidan boshlab, ushbu tizimning Buxoro shahar bo‘limi inspektori, Buxoro va Sirdaryo viloyatlari boshqarmalari inspektori, Guliston shahar bo‘limi boshlig‘i lavozimlarida ishlagan.
2013 yildan beri tadbirkorlik tizimida faoliyat ko‘rsatmoqda. Bugungi kunga qadar Jondor tumanidagi «Chinor» fermer xo‘jaligini boshqarib kelayotgan edi.
- 2020 yil dekabridan buyon Jondor tumaniga hokimlik qilib kelgan San’atillo Hikmatov 2023 yil iyul oyida Navoiy viloyati hokimining qishloq va suv xo‘jaligi masalalari bo‘yicha o‘rinbosari lavozimiga tayinlangandi.
- Bundan oldin Buxoro tumaniga yangi hokim tayinlangandi. Halim Safarov Buxoro tumani hokimi vazifasini bajaruvchi bo‘ldi. Tumanning oldingi hokimi Xayrullo Jo‘rayev prezident tanqididan so‘ng ishdan olingan.
