«Bunday qarashlar Rossiyaning tobora kamayib borayotgan nufuzini yanada pasaytirmoqda» - deputat Prilepinning so‘zlariga javob qaytardi

«Yuksalish» harakati raisi Bobur Bekmurodov rossiyalik propagandachi yozuvchi Zaxar Prilepinning sobiq SSSR hududlarini Rossiya tarkibiga qo‘shib olish bo‘yicha taklifi yuzasidan munosabat bildirdi.

«Zaxar Prilepinning «O‘zbekistonni bosib olish» tahdidi mutlaqo qabul qilib bo‘lmaydigan holat. 

Rus siyosatchilarining bunday qarashlari shubhasizki, o‘zbekistonliklar orasida Rossiya Federatsiyasiga salbiy munosabatni kuchaytirmoqda. 

Uning tobora kamayib borayotgan nufuzini yanada pasaytirmoqda. Rus siyosatchilari agressiv kayfiyat va so‘zlar bilan do‘st orttirib bo‘lmasligini anglab yetishi zarur. Aynan shunday agressiv harakatlari do‘stona munosabatdagi mamlakatlar bilan aloqalarning yomonlashishiga sabab bo‘lmoqda», degan u o‘z videomurojaatida.

Deputat Zaxar Prilepinni bunday harakat O‘zbekiston Respublikasi Jinoyat kodeksining 159-moddasida (O‘zbekiston Respublikasining konstitutsiyaviy tuzumiga tajovuz qilish) nazarda tutilgan jinoiy javobgarlikni keltirib chiqarishi haqida ogohlantirgan. 

«Prilepin va boshqa rus siyosatchilari ilgari surayotgan bunday qarashlar illyuziyadan boshqa narsa emas. Kimgadir yoqadimi, yoqmaydimi, O‘zbekiston mustaqil, mustahkam suverenitetga ega mamlakatdir.
 
Qolaversa, qariyb 60 ming a’zoga ega bo‘lgan harakat nomidan Rossiya rasmiylarini ittifoqchi mamlakatga nisbatan bunday agressiv bayonotlarga e’tibor qaratishga va batamom chek qo‘yishga chaqiraman», degan u. 

Prilepin bu gaplari bilan Rossiya Konstitutsiyasining o‘zga davlatlar bilan tinch hayot kechirish, ichki ishlariga aralashmaslikni nazarda tutuvchi 79.1 moddasiga ham qarshi chiqayotgani qo‘shimcha qilingan.

Bundan oldinroq rossiyalik yozuvchi Zaxar Prilepin migrantlar muammosini hal etish uchun sobiq SSSR hududlarini Rossiya Federatsiyasi tarkibiga qo‘shib olishni va uning aholisiga rus tilini o‘rgatishni taklif etgandi, uning bu so‘zlari O‘zbekiston aholisida katta e’tirozlar uyg‘otmoqda.