Riodagi qonli reyd: qurbonlar soni 130 kishidan oshdi

Braziliya tarixida eng qonli politsiya amaliyoti oqibatida halok bo‘lganlar soni 132 nafarga yetdi. Mahalliy aholining aytishicha, halok bo‘lgan erkaklarning jasadlari Rio-de-Janeyroning chekkasidagi maydonga yotqizib qo‘yilgan. Amaliyotda begunoh odamlar ham otishmaga tushgani borasida ko‘plab savollar ochiq qolmoqda.

{Yii::t(}

O'tkazib yuborish 6s

O'tkazib yuborish

28 oktabr kuni Rio-de-Janeyroda shahar tarixidagi eng qonli politsiya amaliyoti o‘tkazildi. Rio shtati hukumati seshanba kungi operatsiyani «Qizil qo‘mondonlik»to‘dasiga qarshi tarixdagi eng yirik reyd deb atagan. Birinchi kunda qurbonlar soni 64 kishi ekani, ularning 4 nafari politsiya xodimlari ekani aytilgandi.

30 oktyabrga kelib, qurbonlar soni ikki barobarga oshib, 132 nafarga yetgan. Aslida bugun ham aniq hisob noma’lum qolmoqda.

Mahalliy aholi vakillariga tayanib, New York Times'ning yozishicha, halok bo‘lgan erkaklarning jasadlari Rio-de-Janeyroning chekkasidagi maydonda — bir safda yotqizilgan. Ko‘plarining ust-boshi yechilgan — bu qarindoshlarga ularni tanishni osonlashtirish uchun qilingan. Tunda yaqin atrofdagi o‘rmonzor hududidan yana o‘nlab jasadlar topilgan.

Amaliyot qanday kechgani, begunoh odamlar ham otishmaga tushganmi va o‘limlar uchun kim javobgar ekani borasida ko‘plab savollar ochiq qolmoqda. Rasmiylardan biri chorshanba kuni asosiy maqsad — to‘da rahbarini qo‘lga olish bajarilmaganini tan oldi.

Ko‘plab aholi uchun fojianing birinchi belgisi seshanba kuni soat 3:30 atrofida itlarning vahimali hurishidan boshlangan. Oradan ko‘p o‘tmay, internet va elektr uzilgan. Soat 5 ga yaqin, tong yorishishidan oldin esa o‘q ovozlari yangragan. Hududga 2 500 dan ortiq politsiyachi, o‘nlab zirhli mashinalarda bostirib kirgan. Ular «Qizil qo‘mondonlik» deb ataluvchi yirik to‘daga aloqador giyohvand sotuvchilarni qidirishgan. Havo ustida ikki politsiya vertolyoti aylanib yurgan.

Bu favqulodda qonli voqea Rio shahrini larzaga soldi — bu shahar jinoyatchilar va politsiya o‘rtasidagi to‘qnashuvlarga o‘rganib qolgan bo‘lsa-da, bunday miqyosdagi fojiani ilgari ko‘rmagan.

Rio hokimiyati uzoq yillardan beri jinoiy guruhlarga qarshi keskin usullarni qo‘llab keladi. Viloyat gubernatori Klaudio Kastro reydni muvaffaqiyat sifatida ko‘rsatdi — 113 kishi hibsga olingan, 118 dona qurol va bir tonna giyohvand moddalar musodara qilinganini aytdi.