Bloger Olimjon Haydarov tovlamachilikda gumonlanib qo‘lga olindi

Farg‘ona viloyati IIB bloger Olimjon Haydarov tovlamachilik ustida qo‘lga olingani haqida xabar tarqatdi.

“Aniqlanishicha, fuqaro O.X. joriy yilning 12 iyun kuni “Qo‘qon Istiqlol” savdo kompleksida norasmiy savdo faoliyati bilan shug‘ullangan tadbirkorlarning ishonchiga kirib, ularda norozilik kayfiyatini uyg‘otish orqali, savdo komplekslaridagi rekonstruksiya ishlari bo‘yicha salbiy mazmundagi maqolalarni o‘ziga tegishli ijtimoiy tarmoq kanallariga joylashtirgan.

Qo‘shimcha ravishda, bloger “Qo‘qon Istiqlol” savdo kompleksi MChJ rasmiylaridan tovlamachilik yo‘li bilan moddiy mablag‘ undirishga urinib, o‘zi tomonidan tayyorlangan “Qo‘qonda huquqiy demokratik boshqaruvmi yoki shar’iy boshqaruvmi?» nomli salbiy mazmundagi maqolani internet tarmoqlarida tarqatmaslik evaziga, 10 ming AQSh dollarini tovlamachilik yo‘li bilan talab qilib, undan umumiy qiymatda 7,5 ming AQSh dollarini qo‘lga kiritib, qo‘shimcha 2.500 AQSh dollarini olayotgan vaqtida tezkor tadbir ishtirokchilari tomonidan qo‘lga olingan”, – deyiladi rasmiy xabarda.

Qayd etilishicha, hozirda holat yuzasidan Qo‘qon shahar IIB tomonidan tergovga qadar tekshiruv harakatlari olib borilmoqda.

Ma’lumot uchun, Haydarov 12 iyul kuni Telegram-kanalida Qo‘qondagi yonib ketgan bozorda do‘koni bo‘lgan ko‘plab tadbirkorlar rekonstruksiyadan keyin do‘konsiz qolishi mumkinligini aytib maqola e’lon qilgan.

Tanqidiy chiqishlari bilan tanilgan Olimjon Haydarov 2022 yil iyulida diniy adovatni targ‘ib qiluvchi materiallar tarqatishda ayblanib, 15 sutka ma’muriy qamoqqa olingan, 2 sutkadan keyin apellyatsiya sudi qarori bilan ozod etilgandi. U, shuningdek, o‘tgan yili dekabrda mitinglar o‘tkazish tartibini buzish va yolg‘on axborot tarqatishda ayblanib 21 mln so‘m jarimaga tortilgandi.