Марказий банк томонидан “банклар томонидан битта жисмоний шахсга (битта ЖШШИРга) карталар сонини битта банкда 5 тагача, барча банкларда 20 тагача эмиссия қилиш мумкинлиги” бўйича вақтинчалик тартиб ишлаб чиқилган. Бу ҳақда банк соҳасига оид “Мижозлар учун!” блоги маълум қилди.
Қайд этилишича, янги тартиб “хизмат доирасида фойдаланиш учун” грифи остида тижорат банкларига ижро учун жўнатилган.
Карталар сонига чеклов виртуал ва кобейджинг карталарига ҳам тааллуқли бўлиб, чет эл валютасида очилган банк карталарига нисбатан татбиқ этилмайди.
Тартибнинг амал қилиш муддати 2025 йилнинг 1 январидан 31 декабрига қадар этиб белгиланган.
Шунингдек, банкларга жисмоний шахснинг банк карталарида (жумладан виртуал картасида) 12 ой давомида ҳеч қандай амалиёт бажарилмаган бўлса, ушбу карталар блокланиши ва карта эгасига хабар берилиши вазифаси ҳам юклатилган.
Аввалроқ, Марказий банк раиси ўринбосари Беҳзод Ҳамраев айрим мижозлар номига юзлаб пластик карталар очилгани, бундай карталардан фирибгарлар пул маблағларини ўзлаштириш схемаларида фойдаланаётгани ҳақида айтганди.
