«Методлар қачон ўзгаради?» — Алламжонов сурхондарёлик блогернинг қамаб қўйилганига ИИВдан изоҳ талаб қилди

Отабек Сатторий Сурхондарёда маҳаллий амалдорларнинг танқидчиси сифатида танилган. ИИВ Тергов департаменти блогер 5 млн сўмлик телефонни гўёки товламачилик йўли билан олган вақтида ушланганини баён қилиб чиқди.

Ҳолат юзасидан ЖКнинг 165-моддаси (товламачилик) билан жиноят иши очилган. Эҳтиёт чорасига оид суд ёпиқ тарзда ўтган. Олий суд ахборотига кўра, ёпиқ суд мажлисида Сатторийга нисбатан қамоқ эҳтиёт чорасини қўллаш бўйича прокуратура киритган илтимосномани Термиз шаҳар суди қаноатлантирган.

Масс-медиа фонди блогернинг бу тахлит қамоққа олинишини кескин қоралаб, воқеа бўйича қатор саволларни ўртага ташлади.

Фонд раиси Комил Алламжонов блогер «босиб олиб кетилгани», энг оғир эҳтиёт чораси танлангани ва иш ёпиқ судда кўрилаётганига эътибор қаратди.

«Нима учун энг хавфли жиноятчидек унинг уйида тинтув ўтказилди, нима учун у кўплаб одамлар билан олиб кетилди, нима учун суд ёпиқ бўляпти?

Барча товламачиликда гумон қилинган фуқароларга шунақа муносабат қилинадими? Ёки блогер бўлгани учун шундай алоҳида «ҳурмат-эҳтиромми»? Бу нормал ҳолатми?

Ички ишлар вазирлиги бу масала юзасидан изоҳ бериши шарт. Методлар қачон ўзгаради? Босиб олиб кетмай, идорага қонуний чақирув қоғози билан чақирилса, келмас эдими?

Эҳтиёт чораси сифатида нима учун энг оғири, қамоқ танланди?

Қонун ҳамма учун баробар экан, орган ходимлари ҳам ошириб юборишмасин. Бизнинг жамоат фондимиз бундай хатти-ҳаракатни кескин қоралайди», – дея баёнот берди Комил Алламжонов.

Масс-медиа фонди раиси Бош прокуратурадан ҳолатга ҳуқуқий баҳо беришни сўраган.

«Албатта, бизнинг ҳамкасбларимиз орасида ҳам бошқа соҳалар каби қонунбузарлари бор. Вилоят, шаҳарларда ўзини блогерман деб, турли товламачилик йўллари билан кун кўраётганлар йўқ эмас. Лекин аксарият халқ дарди билан яшайдиган журналист ва блогерлар билан боғлиқ ҳуқуқий масалалар максимум очиқ-ошкора, шаффоф бўлиши керак.

Бир сўз билан айтганда, янги Ўзбекистонда бу масала ҳам янгича бўлиши керак», – дея қўшимча қилган Алламжонов.

Айни пайтда, Олий Мажлис депутати Расул Кушербаевнинг ишонишича, блогер айнан касбий фаолияти ортидан қамоққа олинган.

У мазкур воқеани «сурхондарёлик амалдорларнинг битта блогерга эмас, бутун бошли сўз эркинлигига, президентнинг очиқлик сиёсатига қарши исёни» деб баҳолади.

Сатторийнинг адвокати айбловни бутунлай инкор этган. У ишни уюштирилган деб ҳисобламоқда.