Қимматлаган уй-жойлар, тадбиркорларга имтиёзлар, банк сири қонунидаги ўзгаришлар – ҳафтанинг иқтисодий хабарлари

Йилнинг биринчи ярмига якун ясаган ҳафтада Ўзбекистон иқтисодиётида муҳим янгиликлар содир бўлди. Kun.uz ҳафтанинг «пуллик» хабарларини тўплади.

Давлат бюджети харажатлари оширилади

Давлат бюджети харажатлари 13,1 триллион сўмга оширилади. Туризм объектлари атрофидаги ер майдонлари, сув ва йўл инфратузилмаларини яхшилаш учун кўпроқ маблағ ажратилади. Шунингдек, олий ўқув муассасаларига давлат грантида қабул кўрсаткичларини 25 фоизга ошириш учун ҳам пул ажратилиши кўзда тутилмоқда.

1 июлдан тадбиркорларга бир қатор имтиёзлар берилади

- 2021 йил 1 июлдан 2024 йил 1 июлгача асосий фаолияти паррандачилик бўлган тадбиркорларга фойда солиғи (тижорат банкларида жойлаштирилган маблағлардан олинган фоизлардан ташқари), мол-мулк солиғи, ер солиғи, сув ресурсларидан фойдаланганлик учун солиқ ставкаси 50 фоиз миқдорида қўлланади;

- Оилавий нодавлат мактабгача таълим ташкилотлари тармоғини кенгайтириш ва уларнинг ривожланиши учун имтиёзлар берилади;

- ҚҚС тўловчиси бўлган чорвачилик, паррандачилик ва балиқчилик хўжаликларига субсидиялар берилади.

2021 йилда Ўзбекистон иқтисодиёти 5,6 фоизга ўсиши прогноз қилинди

Европа тикланиш ва тараққиёт банки Ўзбекистон иқтисодиёти 2021 йилда 5,6 фоиз, 2022 йилда эса 6 фоизга ўсишини прогноз қилди.

Халқаро экспертларга кўра, Ўзбекистон иқтисодиётининг асосий тармоқлари — хизматлар, саноат, қурилиш ва қишлоқ хўжалиги — 2021 йилда ўсишга эришади.

Хитой Ўзбекистон экспортида етакчилик қилмоқда

Давлат статистика қўмитаси 2021 йилнинг январ-май ойларида Ўзбекистон экспортида юқори улушга эга бўлган ҳамкор давлатлар ўнлигини эълон қилди.

Унга кўра, 835,4 млн долларлик экспорт билан Хитой биринчи поғонани эгаллаган. Шунингдек, Туркия (694,1 млн) ва Россия (658,6 млн) рўйхатнинг иккинчи ва учинчи ўринларини банд қилган.

Ўзбекистонда уй-жой нархи 5 фоизга қимматлади

Ўзбекистонда 2-чоракда уй-жой нархи 1-чоракка нисбатан 5 фоизга қимматлаган. Бу пандемия даврида «кечиккан талаб» омили билан изоҳланмоқда.

Жорий йилнинг апрел ойидан июнгача Ўзбекистонда кўчмас мулкни сотиш ва сотиб олиш шартномалари бўйича январ-март ойларига нисбатан 38 фоиз кўпроқ битимлар тузилган.

Навоийдаги олтин кони 10 миллион долларга сотувга қўйилди

2021 йил 1 июл куни OLX.uzда Навоий вилоятидаги олтин кони сотувга чиқарилгани ҳақида эълон пайдо бўлди. Майдони 1 500 гектар деб кўрсатилган коннинг нархи 10 миллион AҚШ долларига баҳоланган.

Банк сири қонунига ўзгартиришлар киритилди: асосий янгиликлар нимада?

Эндиликда ҳуқуқни муҳофаза қилувчи органлар фуқаронинг банкларда ҳисобварағи бор-йўқлигини Марказий банкнинг маълумотлар базасидан автоматик равишда олиши мумкин. Бунинг учун прокурор санкция бериши шарт эмас (қонуннинг аввалги таҳририда бундай маълумотни олиш учун прокурор санкцияси керак эди).

Ҳисобварақда пул бор-йўқлиги, ундаги қолдиқ маблағ миқдори, транзакциялар ёки кредит қарздорлиги каби маълумотларни билиш учун худди аввалгидек прокурор санкцияси керак.