Сурхондарё вилояти Жарқўрғон туманида ҳайдовчилик гувоҳномаси бўлмаган маст ҳайдовчи одам уриб юборган. Оқибатда жабрланувчи оғир тан жароҳатлари олиб воқеа жойида вафот этган. Бу ҳақда вилоят ИИБ ЙҲХБ ахборот хизмати хабар бермоқда.
Маълум қилинишича, жорий йил 12 октябр куни 20:00 ларда М41 Бишкек–Душанбе–Термиз халқаро автомобиль йўлининг Жарқўрғон тумани Порлоқ юлдуз маҳалласи ҳудудидан ўтган 1556-километрида номаълум машина 1969 йилда туғилган С.М.ни уриб қочиб кетган.
Хабар вилоят ИИБ навбатчилик қисмига келиб тушгач номаълум машинани қидириб топиш бўйича чоралар белгиланиб, суриштирув бошлаб юборилган. Олиб борилган суриштирувлар натижасида фуқарони Жигули машинаси уриб юборгани, унинг бошқарувида эса Бойсун туманида яшовчи шахс бўлгани аниқланган. Гумонланувчи жавобгарликдан қутулиб қолиш учун машинасини устахонада таъмирлатган.
Қайд этилишича, ҳодиса юзасидан Жарқўрғон туман ИИБ томонидан Жиноят кодексининг 266-моддаси 2-қисми, 117-моддаси 2-қисми билан жиноят иши қўзғатилган. Ҳозирда тергов-суриштирув ҳаракатлари олиб борилмоқда.
