ИЭСлар ва Uzcard ҳам хусусийлаштирилади

Ўзбекистондаги 6 та иссиқлик электр станциясига эгалик қилувчи “Иссиқлик электр станциялари” АЖ хусусийлаштирилади. Давлат активларини бошқариш агентлиги хусусийлаштириш стратегиясини ишлаб чиқиш учун профессионал консалтинг компаниясини жалб қилиш тўғрисида эълон берди.

Маҳаллий ва хорижий талабгорлар бир ой ичида, 20 сентябр куни соат 18:00 га қадар ариза бериши мумкин.

“Иссиқлик электр станциялари” АЖ таркибига 6 та иссиқлик электр станцияси, 3 та иссиқлик электр маркази ва соҳа корхоналарига хизмат кўрсатувчи 3 та ташкилот киради.

Тизим корхоналари 2021 йилда 60,5 млрд кВт.соат электр энергияси ва 5,6 млн Гкал иссиқлик энергияси ишлаб чиқарган. Бу кўрсаткич 2022 йилда 55,9 млрд кВт.соат ва 5,1 млн Гкал бўлиши кўзда тутилган.

2021 йил якунига кўра компания 360,1 млрд сўм миқдоридаги соф фойдага, шунингдек 13,2 трлн сўм миқдоридаги устав капиталига эга.

Давлат активларини бошқариш агентлиги “Ягона умумреспублика процессинг маркази” МЧЖ (Uzcard тўлов тизими)даги давлат улушини сотиш жараёни ҳақида ҳам маълумот берди.

Компания устав капиталидаги 5 та давлат банкининг жами 75,0 фоиз улуши агентликка ўтказилган ва бу улуш тўлиқ сотилади. Айни пайтга келиб, мустақил баҳоловчи ташкилот давлат улушини баҳолаб бўлган ва унинг ҳисоботи ҳаққоний экани экспертизадан ўтказилган.

Қонунга кўра, МЧЖ иштирокчиларидан бирортаси ўз улушини сотаётган бўлса, бу улушни сотиб олишда жамият иштирокчилари учинчи шахслар олдида имтиёзли ҳуқуқдан фойдаланади. Шунга кўра, агентлик давлат улушини сотиб олишда имтиёзли ҳуқуқдан фойдаланиши мумкинлиги тўғрисида жамиятнинг қолган иштирокчиларини ҳамда жамиятнинг ўзини хабардор қилган.

Бошқа таъсисчилар сотиб олишдаги имтиёзли ҳуқуқдан фойдаланмаса, бу активлар белгиланган тартибда оммавий савдога чиқарилади.

Аввалроқ Давлат активларини бошқариш агентлиги Uzbekistan Airways'ни хусусийлаштириш стратегиясини ишлаб чиқиш учун профессионал консалтинг компаниясини жалб қилиш тўғрисида эълон берган эди.

Шу ҳафта, шунингдек, давлат иштирокидаги 21 та йирик компанияга IPO ва SPO учун муддатлар белгиланди.