Депутатлар «2023 йил учун Давлат бюджети тўғрисида»ги қонунни қайта кўриб чиқадими?

Маъмурий ўзгаришларни кўзда тутувчи президент фармони имзоланди. Унда ҳокимият органларининг сонини 61 тадан 28 тагача қисқартириш назарда тутилган. Қонунчилик палатаси депутатлари томонидан бир неча кун ичида шошилинч қабул қилинган асосий молиявий ҳужжат қайта кўриб чиқиладими?

Фото: Олий Мажлис

22 декабрь куни Олий Мажлис Қонунчилик палатаси йиғилишида «2023 йил учун Ўзбекистон Республикасининг Давлат бюджети тўғрисида»ги қонуни лойиҳаси иккинчи ва учинчи ўқишдан кейин қабул қилинганди. Аммо, шундан сўнг «Янги Ўзбекистон маъмурий ислоҳотларини амалга ошириш чора-тадбирлари тўғрисида»ги президент фармони имзоланди. Фармонда ижро этувчи ҳокимият органларининг сонини 61 тадан 28 тагача, шу жумладан вазирликлар сонини 25 тадан 21 тагача қисқартириш кўзда тутилган. Kun.uz депутат Наврўз Ризаев билан боғланиб, “Қонунчилик палатаси давлат бюджети ҳақидаги қонунни қайта кўриб чиқадими?” деган савол билан юзланди.

«Бюджет қайта кўрилади, шунақа келишилган. Қонун лойиҳаси Қонунчилик палатасига қайтарилмайди, унга ўзгартиришлар киритилади. Молия вазири ўринбосари Аҳадбек Ҳайдаровнинг бизга маълум қилишича, вазирликлар ўзгарганидан кейин, маблағлар ажратиш қайта тақсимотда назарда тутилади.

Менинг билишимча, «Давлат бюджети тўғрисида»ги қонун тасдиқланади ва кейинги йилда мазкур қонунга ўзгартириш ва қўшимчалар киритиш масаласи кўриб чиқилади. Тақсимотда ҳамма жиҳатлар эътиборга олинади», - деди депутат.

Маълумот учун, 2022 йил 27 декабрь куни чақириладиган Сенатнинг ўттиз олтинчи ялпи мажлисида «2023 йил учун Ўзбекистон Республикасининг Давлат бюджети тўғрисида»ги қонунни кўриб чиқиш режалаштирилган.