Сурхондарёда автобус билан тўқнашган Damas йўловчиси вафот этди

Иккинчи даражали йўлдан келаётган Nexia-3 асосий йўлдан келаётган Damas билан тўқнашиб, уни автобус қаршисига чиқариб юборган.

Видеодан кадр

Сурхондарё вилоятида учта транспорт воситаси иштирокида содир бўлган йўл-транспорт ҳодисаси оқибатида йўловчи вафот этган.

ИИВ ЙҲХББ ахборот хизматининг хабар беришича, ҳодиса 2023 йил 9 январ соат 17:20 ларда Денов туманида содир бўлган.

М-41 Бишкек-Душанбе-Термиз автомобил йўлининг 1487-километрида Nexia-3 ҳайдовчиси машинани иккинчи даражали йўлдан бошқариб келиб, асосий йўлдан келаётган Damas билан тўқнашган.

Шундан сўнг Damas бошқарувни йўқотиб, қарама-қарши йўналишдан келаётган автобусга урилган.

Оқибатда, Damas йўловчиси оғир тан жароҳатлари олиб, шифохонада вафот этган.