Африка давлатлари Путинни «ғалла битими»га қайтишга чақирди

Африка давлатлари Россия президенти Владимир Путинни Украинага қарши урушни тўхтатиб, Украина ғалласини экспорт қилиш бўйича «ғалла битими»га қайтишга чақирди. «Африка давлатлари томонидан таклиф этилган Украинадаги вазиятни тинч йўл билан тартибга солиш режаси эътиборга лойиқ. Биз яна бир бор Европада тинчликни тиклашга чақирамиз», деди Конго президенти Денис Сассу Нгуэссо, жума, 28 июль куни Санкт-Петербургда бўлиб ўтган Россия-Африка форумида.

ЖАР президенти Сирил Рамафоса «конструктив ҳамкорлик ва музокаралар» урушни тугатишга олиб келишига умид билдирди. Ўз навбатида, Миср президенти Абдел-Фаттоҳ ас-Сиси Россияни Украина ғалласини Қора денгиз орқали экспорт қилиш бўйича келишувни янгилашга чақирди, Москва ундан ўн кун аввал бир томонлама чиқиб кетган эди.

Африка етакчилари Россияни тўғридан тўғри танқид қилмади, бироқ саммитнинг иккинчи кунида Украинадаги уруш оқибатлари, айниқса, озиқ-овқат нархларининг кескин ошиб кетишидан чуқур хавотир билдирди.

Владимир Путин Африка давлатлари таклиф қилган тинчлик режасини ҳурмат қилишини ва уни синчиклаб ўрганишини айтди. У, шунингдек, Россия позициясини яна бир бор таъкидлади, унга кўра, Москва Украина билан музокараларга тайёр, аммо Киев уларни рад этяпти.