«Реал» Килиан Мбаппе бўйича узил-кесил бир қарорга келган.
Фото: Getty ImagesФото: Getty Images
Ёзги трансферлар давом этмоқда, яна бир қатор футболчилар ўзларига янги клуб топишди, яна бир қанча трансферлар ҳал бўлиши кутилмоқда. Қуйида сўнгги куннинг энг қизиқарли трансфер хабарлари дайжести.
Айни вақтда 32 ёшда бўлган футболчи 2018 йилда «Лестер»дан трансфер қилинган ва сўнгги олти йилни «Манчестер Сити»да ўтказганди.
«Шаҳарликлар» футболчи трансфери учун 35 миллион евро олган, шунингдек бонуслар ваъда қилинган. Маҳрезнинг ўзи «Ал-Аҳли» билан 2027 йилга қадар амал қилувчи шартномага имзо чеккан. Ушбу клуб бунгача дарвозабон Эдуард Менди («Челси») ва ҳужумчи Роберто Фирминони («Ливерпул») ўз сафига қўшиб олганди.
«ПСЖ» Икардини «Галатасарой»га сотди
Аргентиналик форвард Мауро Икарди «Галатасарой» клубининг тўлақонли аъзосига айланди. «ПСЖ» 30 ёшли ҳужумчиси учун 10 миллион евро ишлаб олган.
Икардининг ўзи турклар клуби билан уч йиллик шартнома тузди. 2020 йилда «ПСЖ» Икардини «Интер»дан 58 миллион евро эвазига трансфер қилганди.
Футболчи сўнгги бир мавсумни «Галатасарой»да ўтказган ва жамоага Суперлигада ғолиб чиқишда ёрдам берганди. Туркиянинг амалдаги чемпиони кучли таркиб йиғмоқда, Икардидан ташқари, Анхелиньо, Торрейра, Мертенс, Мата, Заҳа, Бакамбу ҳам жамоада.
Кавани «Бока Хуниорс»га ўтди
Уругвайлик ҳужумчи Эдинсон Кавани «Валенсия»ни тарк этди. У испан клуби билан шартномани бекор қилишга эришган (шартнома тугашига яна бир йил бор эди).
Энг яхши йилларини «Наполи» ва «ПСЖ»да ўтказган 36 ёшли футболчи энди «Бока Хуниорс» учун тўп суради.
Уругвайлик футболчи Аргентина клуби билан 2024 йилга қадар амал қилувчи шартномани имзолаган.
«Аякс» юлдузи АПЛнинг ўртамиёна клубида
Мавзуга оид
Лондоннинг «Фулҳэм» клуби киши билмас тарзда ажойиб трансфер амалга оширди. АПЛнинг ўртамиёна клуби 22,5 млн евро эвазига «Аякс» ҳимоячиси Кэлвин Бейссини сафига қўшиб олди. 23 ёшли футболчи билан тўрт йиллик шартнома тузилган. Нигериялик футболчи «Аякс»да атиги бир мавсум ўйнади: амстердамликлар уни 2022 йил ёзида «Рейнжерс»дан сотиб олганди. Энди Бейсси дунёнинг энг кучли лигасига йўл олди. Агар у «Фулҳэм»да ўзини кўрсата олса, унда янада каттароқ жамоага ўтиш имкони пайдо бўлади.
«Милан» Самуэл Чуквезени сотиб олди
Бу трансфер бўйича музокаралар анчадан буён олиб борилаётганди, энди эса бу келишув ҳақида расман эълон қилинди. 24 ёшли реактив вингер «Вилярреал»дан «Милан»га ўтиб, 5 йиллик шартнома тузди ва 21-рақамли футболкани танлади. ОАВдаги хабарларга кўра, ушбу трансфер италян клубига 25 млн еврога тушган.
Амалда ҳал бўлган трансферлар
Фото: EMILIO ANDREOLI/GETTY IMAGES
«Манчестер Юнайтед» Ҳойлундни сотиб олмоқда
«Манчестер Юнайтед» иккита катта трансферга тайёрланмоқда. Англия клуби «Аталанта»дан 20 ёшли даниялик ҳужумчи Расмус Ҳойлундни сотиб олади. The Athletic маълумотига кўра, «МЮ» бу футболчи учун 75 миллион евро тўлайди, яна 10 миллион евро бонуслар кўринишида ўтказиб берилиши мумкин. Фабрицио Романо маълумотига кўра, футболчи билан беш йиллик шартнома имзоланади.
«Янги Ҳоланд» лақабини олган форвард ўтган мавсум А сериянинг 32 ўйинида 9 гол уришга эришган. «Аталанта» футболчи сотувидан 90 миллион евро ишлаб олишни кўзлаганди, аммо якунда «МЮ»нинг таклифига розилик берган.
Манкунианликлар яна бир жиддий трансфер устида ишламоқда — «Фиорентина»дан 26 ёшли марокашлик таянч яримҳимоячиси Софиян Амрабат сотиб олинади. The Guardian маълумотига кўра, «МЮ» кераксиз футболчилардан кимнидир сота олса, бу трансфер амалга ошиши мумкин бўлади. Амрабатнинг трансфер қиймати 50 миллион евро атрофида бўлиши мумкин.
«Ливерпул»ни чемпионлик таркибидаги яна бир футболчи тарк этди
Фабиньонинг Саудия Арабистонига трансфери достони поёнига етмоқда. Инсайдер Фабрицио Романо «Here We Go» ибораси билан ушбу бразилияликнинг «Ал-Иттиҳод»га трансфери ҳал бўлганини хабар қилди. 29 ёшли футболчи аллақачон тиббий кўрикдан ўтиб бўлган.
Трансфер қиймати – 40 млн евродан ортиқ, футболчи билан уч йиллик шартнома тузилади. Журналист Николо Ширанинг маълумотига кўра, футболчининг йиллик маоши миқдори 25 млн еврони ташкил этади.
Фабино – Чемпионлар лигаси ва Англия чемпионатида ғолиб бўлган «Ливерпул» таркибининг муҳим қисми эди. Аммо сўнгги мавсумда ушбу таянч яримҳимояси вакили ўйинида пасайиш кўзга ташланди. Катта эҳтимол билан Юрген Клопп шунинг учун ҳам уни ушлаб қолишга ҳаракат қилмади. Бундан аввалроқ жамоа сардори Жордан Ҳендерсон ҳам 33 ёшида «Ливерпул»ни тарк этиб, Саудия Арабистонига, Стивен Жеррард бошқарувидаги «Ал-Иттифоқ» клубига йўл олганди.
Саудия Арабистонида мини-Суперлига йиғилмоқдами?
Яна бир топ-футболчи тез орада Саудия лигасида пайдо бўлади! Романонинг хабар қилишича, «Бавария» ва «Ан-Наср» Мане трансфери бўйича келишувга эришган.
«Ливерпул»дан кетганидан кейин сенегаллик ҳужумчи Германия чемпионатига мослаша олмади. «Бавария» уни сотиш учун вариантлар қидираётганди ва Саудия Арабистонидан барчани қониқтирадиган таклиф бўлди. Трансферни эълон қилиш учун футболчи тиббий кўрикдан ўтиши ва клублар ҳужжатларнинг бир қисмини келиши олиши масаласи қолган.
Романонинг маълумотига кўра, «Ан-Наср» 31 ёшли вингер учун мюнхенликларга 40 млн еврога (30 млн евро ва бонуслар) яқин маблағ тўлаб беради. Садио аллақачон бўлажак клуби билан ўзаро шартномани келишиб олган, унга кўра йилига 40 млн евро олади. Роналду тўп сураётган ушбу клубга бунгача Фофана, Брозович ва Теллес қўшилганди.
«Россонерилар» ёзги кампанияни давом эттирмоқда. Сандро Тонали кетганидан кейин клубга бир неча футболчи олиб келинди: Рубен Лофтус-Чик, Кристиан Пулишич (иккиси ҳам – «Челси»), Самуэл Чуквезе («Вилярреал»), Ноа Окафор («РБ Зальцбург») ва Тейани Рейндерс (АЗ). Навбатдаги трансфер – «Валенсия» яримҳимоячиси Юнус Муса бўлади.
Фабрицио Романога кўра, «Милан» ушбу америкалик футболчи билан ҳам, испан клуби билан келишувга эришган. Унга кўра, трансфер учун «Валенсия»га 20 млн евро тўлаб беради. Футболчи тиббий кўрикдан ўтмоқда.
«Челси» яна бир истеъдодли футболчини трансфер қилмоқда
Фото: JEAN CATUFFE/GETTY IMAGES
Лондонликлар ўз трансфер машинасини тўхтатмаяпти. «Челси» «Ренн»дан 19 ёшли яримҳимоячи Лесли Угочуквуни трансфер қилишни истамоқда, деб хабар беради Фабрицио Романо. Лондонликлар ушбу футболчи учун 30 млн евро тўлашга тайёр. «Челси» Угочукву билан ўзаро шартномани келишиб бўлган. Тез орада футболчи тиббий кўрикдан ўтиши кутилмоқда. 2022/2023 йиллар мавсумида Лесли «Ренн» сафида француз чемпионатида 26 ўйинда майдонга тушиб, бир гол урган ва бир голли узатма берган. Уни жамоада қолдириш ёки ижарага бериш масаласини Почеттино йиғинлардан кейин ҳал қилади.
Трансферлар бозорида яна қандай хабарлар?
Усмон Дембеле. Фото: DEFODI IMAGES VIA GETTY IMAGES
Дембеле «ПСЖ»га ўтиши мумкин
Испаниянинг AS нашри «Барселона»нинг 26 ёшли француз вингери Усмон Дембеле «ПСЖ» қизиқишлари доирасида эканини хабар қилди. Агар ҳужумчи Килиан Мбаппе кетса, Дембеле Париж клубининг биринчи мақсади бўлади.
Манбанинг қайд этишича, 1 августдан Дембеленинг шартномасидаги бадал пули миқдори 100 миллион еврога етади, шу санагача эса бу рақам 50 миллион евро бўлиб туради. Француз футболчисининг «Барса» билан шартномаси 2024 йил ёзига қадар тузилган.
RMC Sport журналисти Фабрис Ҳокинснинг қўшимча қилишича, Дембеле трансфери бўйича музокаралар фаол кечмоқда. «ПСЖ» 50 миллион евролик пунктни ишга тушириб, нарх икки баробар ошишидан олдинроқ трансферни ҳал қилишга уринмоқда.
Испаниянинг COPE нашри эса футболчида ҳозирча «ПСЖ» билан ҳеч қандай келишув йўқлигини хабар қилган. Шунингдек, каталонияликлар клубига ҳам ҳозирча расмий таклиф келиб тушмаган, футболчини ҳам «Барселона»да барчаси қониқтирмоқда.
Клубдагилар ҳисоблашича, «ПСЖ»нинг қизиқиши ҳақидаги хабарлар — футболчининг агентининг ҳийласи бўлиб, у шу орқали «Барселона» раҳбариятини янги шартномага кўндирмоқчи.
«Реал» Мбаппени бу ёзда сотиб олмайди
As журналисти Хоакин Марото «Реал» Килиан Мбаппени фақат 2024 йилда, эркин агент мақомида сафга қўшиб олиши мумкинлиги, бу ёзда эса унинг товон пулини тўламоқчи эмаслигини хабар қилди.
Мадрид клуби ёзги трансферлар ойнасида «ПСЖ» билан ушбу форвард бўйича музокара ўтказмаяпти — ва музокара бошлашни режалаштирмаган ҳам. Бундан ташқари, «Реал»дагилар агар уни шу ёзда харид қилмоқчи бўлса, 24 ёшли француз трансфери қанчага тушишини ҳам баҳоламаган.
Аввалроқ Marca нашри «Реал» 2022 йилда мадридликларнинг Мбаппе трансфери бўйича учта расмий сўровини эътиборсиз қолдирган «ПСЖ» президенти Носир Ал-Ҳилайфий билан ҳам тўғридан тўғри музокара ўтказишни истамаяпти.
Килианнинг ўзи эса, нашрнинг қайд этишича, «Реал»нинг ишончини поймол қилганини тушуниб турибди ва ўтган йилги қароридан афсусда.
Яна Саудия чемпионати
Саудия Арабистони Европа клубларини ўзига жалб этишда давом этади.
«ПСЖ» сардори Маркинос ҳам «Ан-Наср» томонидан трансфер қилиниши мумкин. Журналист Руди Галеттининг ёзишича, 29 ёшли бразилияликнинг ўзи ушбу лигага ўтишга рози. Қайд этилишича, саудияликлар клуби «ПСЖ»га расмий таклиф юборган, шунингдек Маркинос билан ўзаро шартнома деталлари муҳокама қилинмоқда.
Журналист Николо Шира эса «ПСЖ» яримҳимоячиси Марко Верратти «Ал-Ҳилол» билан уч йиллик шартнома бўйича келишиб олганини хабар қилмоқда. Саудияликлар клуби «ПСЖ»га 30 ёшли футболчи учун 50 млн евро тўлашга тайёр (30 млн евролик биринчи таклиф рад этилган). «Ал-Ҳилол» ҳозиргача Калиду Кулибали, Малком, Сергей Милинкович-Савич ва Рубен Невешни ўз сафига қўшиб олганди. Жамоани эса Жорже Жезуш бошқаради.
AS хабарига кўра, «Ал-Ҳилол» «Севиля» ҳужумчиси Юсуф Ан-Носирий трансфери учун ҳам 45 млн евро таклиф қилган. Саудия клуби 26 ёшли футболчига 15 млн евро миқдорида йиллик маош тайинлашга тайёр. Марокашлик форвард 2020 йилдан буён «Севиля» сафида тўп сурмоқда. У ўтган мавсумда испан клуби сафида 48 ўйинда майдонга тушиб, 18 гол урган ва икки голга узатма берган. Transfermarkt унинг трансферини 20 млн еврога баҳолаган.
