Сурхондарёда олтин тангани 100 минг долларга сотмоқчи бўлган шахслар ушланди

Сурхондарёда ХIХ аср охирига оид олтин тангани 100 минг долларга сотмоқчи бўлган икки киши ушланди. Танга «Петру Богданову 1899» ёзувли, оғирлиги 61,69 грамм ва маданий бойликка тааллуқли бўлган.

Фото: Иқтисодий жиноятларга қарши курашиш департаменти

Сурхондарё вилоятида ҳуқуқни муҳофаза қилувчи органлар томонидан ХIХ аср охирига оид олтин тангани сотаётган шахслар ушланди. Бу ҳақда Иқтисодий жиноятларга қарши курашиш департаменти матбуот хизмати хабар бермоқда.

Тезкор тадбирда фуқаролар Ж.А. ва А.Ж. ХIХ аср охирига оид олтин тангани фуқаро А.Е.га 100 минг долларга сотган вақтида ашёвий далиллар билан ушланган. Танга «Петру Богданову 1899» ёзувли, вазни 61,69 грамм ва маданий бойликка тааллуқли бўлган.

Ҳолат юзасидан Жиноят кодексининг 177-моддаси (Валюта қимматликларини қонунга хилоф равишда олиш ёки ўтказиш) билан жиноят иши қўзғатилган. Ҳозирда тергов ҳаракатлари ўтказилмоқда.