Кенияда президент кортежи британиялик эркакни уриб кетиб, унинг ўлимига сабаб бўлди

Найробида ҳукумат автомобили британиялик фуқарони уриб кетди. Оқибатда жабрланувчи вафот этди, деб хабар бермоқда The Guardian нашри.

79 ёшли Эдгар Чарлз Фредерик Кенияда яшовчи синглиси ва жиянини кўришга борганди. У Кения пойтахтидаги оммавий тадбирга кетаётганида, президент Уилям Рутонинг кортежи гавжум марказий кўчада юқори тезликда ҳаракатланган.

Машиналардан бири британияликни уриб юборган. Воқеадан сўнг автомобил тўхтамасдан йўлни давом эттирган. Эркак бошидан оғир жароҳат олиб, ҳаётдан кўз юмган.

Ҳайдовчи ҳибсга олинди, бироқ ўша куниёқ гаров эвазига қўйиб юборилди. Полициянинг тушунтиришича, Кенияда президент кортежи хавфсизлик нуқтайи назаридан тез-тез юқори тезликда ҳаракатланади.

Аввалроқ Кениядаги қишлоққа осмондан ярим тонналик металл ҳалқа қулаб тушганди. Жисм ракета бўлаги экани тахмин қилинди. Ҳалқа қулаши оқибатида маҳаллий аҳолига зарар етмаган.