Эрон армияси сунъий интеллектга асосланган ўта махфий қуроли борлигини маълум қилди

Таъкидланишича, бу технологиялар шу қадар ривожланганки, можаро юзага келганда душманнинг «омон қолиш имконияти йўқ».

Фото: presstv.ir

Эрон армияси қуруқликдаги кучлари қўмондони, бригада генерали Кайумарс Ҳайдарий сўзларига кўра, мамлакат сунъий интеллект (СИ) билан ишлайдиган махфий қуролни ишлаб чиққан. Бу ҳақда Press TV хабар берди.

Генералнинг таъкидлашича, арсенал мамлакат ичида ишлаб чиқилган ҳам махфий, ҳам «ўта махфий» тизимларни ўз ичига олади. Унинг сўзларига кўра, бу технологиялар шу қадар ривожланганки, можаро юзага келганда душманнинг «омон қолиш имконияти йўқ».

Ҳарбий технологиядаги СИ тизимларга маълумотларни мустақил равишда таҳлил қилиш, қарорлар қабул қилиш ва операцияларнинг аниқлигини ошириш имконини беради. Масалан, бундай технологиялар дронларда ёки ракета тизимларида нишонни бошқариш учун ишлатилиши мумкин. Ҳайдарий тафсилотларни келтирмади, лекин бу тизимлар Эроннинг жанговар салоҳиятини ошириб, миллий манфаатлар ҳимоясини таъминлашини таъкидлади.

Баёнот Эрон томонидан ҳарбий фаолликнинг кучайиши, жумладан, яқинда ҳарбийларга янги дронлар ва кузатув тизимлари етказиб берилиши фонида янгради. Бу мамлакат мудофаа қобилиятини мустаҳкамлаш стратегиясининг бир қисми экани таъкидланмоқда.