Андижонда икки ой олдин катта тошқин бўлган Сарбонтепа маҳалласи аҳлининг Kun.uz'га маълум қилишича, Жанубий Фарғона канали бўйида яна сув сатҳи кўтарилган ва қирғоқлардаги дамба мустаҳкамлиги шубҳа остида қолмоқда. Вилоят ФВБ ва туман ҳокимлиги хавф катта эмаслигини айтди, лекин мурожаатдан кейин дамба мустаҳкамланди. Мурожаатчилар эса ИИБ биносига олиб борилиб, улардан тушунтириш хати олинди.

Kun.uz'га Андижон вилояти Булоқбоши тумани «Сарбонтепа» МФЙда яшовчи фуқаролардан мурожаат келиб тушди. Бир неча ой олдин бу қишлоқнинг тепа қисмида сув тошиб кетиб, маҳалла аҳли катта талафотлар кўрган эди.

Маҳалла фаолларининг айтишича, жорий йил 8 июлга келиб сувнинг зарар кўриб очилиб кетган жойидан 1-1,5 километр пастроқда, Катта Фарғона каналида сув ёнига қилинган дамба пасайиб кетган. Умумий пасайган жой миқдори 120-150 метр атрофида. Аҳолининг асосий хавотири – дамба ювилиб кетса, катта сув қишлоққа яна зарар етказиши мумкин.

«Халқ қўрқиб, шу ерга ўзининг ёнидан пул сарфлаб тупроқларни олиб келиб тўкяпти. Шу қишлоқни сув ювиб кетмасин деб. Яқинда, икки ой олдин қишлоғимизнинг ярмини сув ювиб кетди. Ўшанда бир соат деганда қишлоқни текислаб қўйди. Мана, 1–1,5 км пастда яна худди шунақа ҳолат такрорланяпти.

Маҳалланинг катталари чиқиб, лента тортяпти, машина юрмасин бу ёққа, деб. Давлатимиздан илтимос қилиб қоламиз, вилоят ҳокими, Булоқбоши тумани ҳокими… Шу нарсанинг эртароқ олдини олинглар. Эртага келиб буни сув ювиб кетадиган бўлса, ундан кейинги ёрдамнинг умуман кераги йўқ. Чунки уйни бошқатдан қилиш керак, умуман ҳамма жой расво бўлиб кетади. Чунки биз ўз кўзимиз билан кўрдик қишлоқда қанақа ҳолат бўлганини. Шу хавфнинг олдини олайлик, сизлардан илтимос қилиб қоламиз», дейилади маҳалла аҳлининг мурожаатида.

Фото: Kun.uz
Фото: Kun.uz

Фаоллар олган видеода бетон каналидан сув сатҳи баъзи жойларда 70-90 смгача кўтарилиб кетганини кўриш мумкин. Мурожаатчининг айтишича, сув ёнидаги хавфли вазиятни тушунтириш учун профилактика инспекторини ҳам чақиришган. Лекин у «ўқишда» бўлгани учун келолмаган. Маҳалла раиси ҳам ёрдамчилари билан «ўқишда» бўлган.