Mazda Россиядаги активларини қайта сотиб олиш имконини биринчи бўлиб йўқотди

Япониянинг Mazda автосаноат компанияси Россиядаги ўз активларини қайта сотиб олиш ҳуқуқини йўқотган тармоқдаги биринчи компанияга айланди. Бренд машиналар ишлаб чиқариш корхонасидаги ўзига тегишли бўлган 50 фоиз улушни қайта сотиб олиш ҳуқуқидан фойдаланмади — бизнесни сотиш шартномасига кўра, бунда унинг ихтиёрида уч йил муддат бор эди. Бу ҳақда 3 ноябр куни Reuters агентлиги хабар берди.

Россияда Mazda’га Владивостокдаги енгил автоуловлар ишлаб чиқариш заводининг ярми тегишли эди. 2022 йил октябрда бренд ўз улушини рамзий 1 евро эвазига бизнесдаги ҳамкори — Россиянинг Sollers компаниясига сотган. Ҳозир эса Sollers шартномада мустаҳкамланган уч йиллик муддат ичида Mazda томонидан «қайта сотиб олиш бўйича ҳеч қандай таклиф ёки сўров олинмади» дея маълум қилди. «Ва ҳозирги шароитда бунга зарурат кўрмаяпмиз», — деб қўшимча қилди компания.

Компания вакилларининг айтишича, Mazda кетгунча йилига 50 мингтагача автомобил ишлаб чиқарган Владивостокдаги завод 2023 йилда қайта ишга туширилган. Эндиликда корхона Sollers бренди остида автобуслар ишлаб чиқариш билан шуғулланмоқда.

Россияни тарк этиш пайтида рамзий нархга сотилган активни қайтариш ва қайта сотиб олиш имкони немис ишлаб чиқарувчилари келишувларида ҳам назарда тутилган. Масалан, Henkel шундай йўл тутган. Компания ўзининг Россиядаги активларини кейинги 10 йил ичида қайта сотиб олиш ҳуқуқига эга. Henkel буни фақат Россия билан муносабатлар сезиларли даражада яхшиланса амалга оширишга тайёр.

Шунга ўхшаш опцион 2023 йилда Россия ҳукумати томонидан маъқулланган Mercedes-Benz’нинг Россиядаги бизнесини сотиш битимида ҳам бўлган. Немис томони мустақил баҳолашдан сўнг бозор нархи бўйича олти йил давомида активларни қайта сотиб олиш имкониятини сақлаб қолган.

Июл ойи ўртасида Россия ОАВ хабар беришича, РФ ҳукумати ҳузуридаги қонун лойиҳалари бўйича комиссия Россиядан кетган хорижий компанияларга ўз бизнесини қайта сотиб олиш бўйича опциoнларни бекор қилиш имконини берадиган қонун лойиҳасига тузатишларни қўллаб-қувватлади.

Ҳужжатга кўра, қайта сотиб олишга қўйилган тақиқни активларнинг янги эгаси ҳам, РФнинг тегишли ваколатли идоралари ҳам бошлаб бериши мумкин. Қонун лойиҳасига, шунингдек, президент фармони билан хорижликлар томонидан акцияларни қайта сотиб олиш ҳуқуқини тўхтатиш учун қўшимча шартларни белгилаш имконини берувчи пункт ҳам киритилди.

Қайд этилишича, янги қоидалар асосан истеъмол секторидаги компанияларга — умумовқатланиш корхоналари, озиқ-овқат ишлаб чиқарувчилар ва савдо тармоқларига тааллуқли бўлади. Бошқа ҳолатларда ёндашув индивидуал бўлиб, хорижий бизнеснинг қайтиши шартлари Россия президентининг алоҳида фармони билан белгиланади.