Тошкент-Самарқанд пулли йўли қурилиш ишлари 2026 йилда бошланади

Транспорт вазири ўринбосари Жасурбек Чориевнинг маълум қилишича, Тошкент-Самарқанд пулли автомобил йўлини қуриш бўйича ДХШ лойиҳаси ғолиби «деярли» аниқ, бироқ у билан ҳали шартнома имзоланмаган.

Тошкент-Самарқанд пулли автомобиль йўлини қуриш бўйича лойиҳа якуний босқичда. Бу ҳақда 19 ноябр куни давлат-хусусий шериклик бўйича учинчи давра суҳбати доирасида Транспорт вазири ўринбосари Жасурбек Чориев Spot’га маълум қилди.

Вазир ўринбосарининг таъкидлашича, ДХШ лойиҳаси ғолиби «деярли» аниқланган, бироқ у билан ҳали шартнома имзоланмаган. Ўз навбатида Чориев тендерда ғолиб чиққан компания номини очиқламаган.

«Лойиҳа якуний босқичда. Биз қурилишни 2026 йил бошига режалаштирмоқдамиз», — деди транспорт вазири ўринбосари.

Аввалроқ, Иқтисодиёт ва молия вазирлигининг 2026−2028 йилларга мўлжалланган фискал стратегиясида ҳам 2026 йилда Тошкент-Самарқанд ва Тошкент-Андижон йўналишларида пулли автомобил йўлларини қуриш лойиҳалари амалга оширилиши кўзда тутилганди.