ЖЧ-2026 қуръаси: Эрматов, Машарипов ва Мартинес қандай фикрда?

Ўзбекистон миллий жамоаси бош мураббийи Фабио Каннаваронинг сўзларига кўра, ЖЧга чиққандан кейин у ерда рақиб танлаш маъносиз, чунки у ерда кучсиз жамоа бўлмайди.

“Бу – жаҳон чемпионати, бу ерда қуръада ким тушишига қараб шикоят қилиб бўлмайди. Португалия ҳам, Колумбия ҳам жуда жиддий рақиблар. Футболчиларимиз учун бу беллашувлар катта ҳаяжон ва қимматли тажриба бўлади”, – деди Каннаваро.

Италиялик мутахассиснинг айтишича, унинг шогирдлари ҳар бир ўйинда бор куч билан майдонга тушади. “Мундиалда бўлаётганимиздан жуда мамнунмиз. Энди энг муҳими – тайёргарликни тўғри олиб бориш ва охиригача курашиш”, – дейди у.

ЎФА биринчи вице-президенти Равшан Эрматов қуръа ҳаяжонли бўлганини айтди.

“Албатта, ЖЧ – бу биз учун биринчи тажриба. Ишонамизки, жамоамиз яхши тайёргарлик кўриб, халқимизни хурсанд қилиб, чиройли ўйинлари билан кейинги босқичларга чиқиш вазифасини уддалаймиз. ЖЧда ўйинлар бир-биридан қизиқ бўлади, осон ўйин бўлмайди, шунга яраша пухта тайёргарлик кўрамиз. Энг муҳими, мухлисларимиз билан мана шу ЖЧдан завқланиб... Бу – бутун умрга эсда қоладиган Ўзбекистоннинг биринчи жаҳон чемпионати бўлади”, – деди у.

Миллий жамоа сардори Жалолиддин Машарипов қуръадан олдин Португалия тушишини тахмин қилганини айтди.

“Қуръадан аввал Португалия тушса керак, деб ўйлагандим. Мухлислар ҳам Роналду ё Мессининг жамоаси дуч келишини хоҳлашаётганди. Португалия билан тушганимиз яхши бўлди. Бундай ташқари, Колумбия ҳам яхши жамоа. Худо хоҳласа, зўр ўйинлар ўтказамиз. Биринчи вазифамиз – гуруҳдан чиқиш ва умид қиламанки, буни уддалаймиз”, – деди ҳужумчи

Гуруҳ фаворити – Португалия бош мураббийи Роберто Мартинес гуруҳдошларидан жиддий рақобат кутаётганини айтди.

“Энди қуръа натижаларига қараб тайёргарликни бошласак бўлади. Гуруҳимиздан мамнунмиз, чунки биринчи ўйинни 17 июнда ўтказиш имконига эга бўлдик, бу – тайёргарлигимизга аниқ йўналиш беради. Аввалига плей-оффдан ўтган жамоага қарши ўйнаймиз, шунинг учун рақибимизни ҳозирча билмаймиз. Лекин Колумбия ва Ўзбекистонга нисбатан ҳурматимиз юқори. Улар жаҳон чемпионатига пухта тайёрланган ва жиддий рақобат таклиф қиладиган жамоалар”, – дея Роберто Мартинеснинг сўзларини келтирмоқда ФИФА матбуот хизмати.

Ўзбекистон – ЖЧ-2026 йилда қатнашадиган собиқ совет маконидаги ягона давлат бўлади. Россиялик спорт шарҳловчиси Денис Казанский қуръа натижаларига муносабат билдираркан, Аббос Файзуллаев Криштиану Роналдуга қарши ўйнашига эътибор қаратди.

“Интригали гуруҳ деярли йўқ. Ҳаммаси бўлиниб кетгандек. Балки Марокаш, Бразилия ва Шотландиядан иборат гуруҳда нимадир янгилик бўлар. Англия, Хорватия, Гана, Панама ҳам ёмон эмас.

Ўзбекистон учун жуда хурсандман. Аббос Криштиануга қарши ўйнайди. Ўйлашимча, улар сенсация қила олишади”, – деди Казанский.

Эслатиб ўтамиз, Ўзбекистоннинг ЖЧдаги илк ўйини 17 июн куни Колумбияга қарши, иккинчи турда эса 23 июн куни Португалияга қарши бўлиб ўтади. Бу иккала ўйин ё АҚШнинг Техас шаҳрида, ёки Мексика пойтахтида ўтади. Учинчи турда саралашдан ўтган рақиб билан тўқнашамиз ва бу учрашув АҚШнинг ё Флорида, ё Жоржия штатида ўтади. Қайси ўйин қаерда бўлиши кейинроқ маълум бўлади.