Apple iOS 26.2 версиясини чиқарди. Нима янгиликлар бор?

Apple iOS 26.2 ва iPadOS 26.2 янгиланишларини чиқариб, тизимни кундалик фойдаланишда янада қулай қилди. Бу сафар асосий эътибор майда, лекин тез-тез сезиладиган функцияларга қаратилган.

Фото: Аббосхон Юсуфжонов

Янгиланишда Liquid Glass дизайни янада мослашувчан бўлди. Энди блокировка экранидаги соатнинг шаффофлигини қўлда созлаш мумкин. Хавфсизлик ҳам кучайтирилди: AirDrop орқали нотаниш қурилмалардан файл қабул қилишда тасдиқлаш коди талаб қилинади. Apple Music’да эса юклаб олинган қўшиқларнинг матнлари интернетсиз ҳам очилади.

Сунъий интеллект подкастларни автоматик равишда бўлимларга ажратиб беради, бу эса узун эпизодларни қулайроқ тинглашга ёрдам беради. Эслатмалар иловасида муҳим вазифалар учун будилник қўйиш имкони пайдо бўлди ва у Фокус режимлари ёқилган пайтда ҳам ишлайди. Ўйинлар кутубхонасига янги фильтрлар қўшилиб, ўйинларни тезроқ топиш осонлашди, контроллерлар билан мослик ҳам кенгайди.

iPad’да кўп вазифа билан ишлаш янада қулайлашди, AirPods учун «Жонли таржима» функцияси Европа ҳудудида ишга тушмоқда. Бунга қўшимча равишда Apple бошқа платформалар учун ҳам 26.2 версияларини чиқарди, macOS’да эса экранга ёруғ ҳалқа берувчи Edge Light функцияси пайдо бўлди.

Технологиялар тез ўзгараётган бугунги кунда энг сўнгги янгиликлардан хабардор бўлиш муҳим. Рақамли дунёда адашиб қолмаслик ва шундай янгиликларни биринчилардан билиш учун KUN.UZ Texnologiya Телеграм саҳифасини кузатиб боринг.

Тайёрлаган: Аббос Юсуфжонов

#Apple #iOS #янгиланиш