Вазир уй олишдан олдин объектни “Шаффоф қурилиш”дан текширишга чақирди. Лекин тизим мураккаблиги айтилмоқда

Қурилиш ва уй-жой коммунал хўжалиги вазири Шерзод Ҳидоятов Қонунчилик палатасининг 10 декабр кунги йиғилишида сўзга чиқиб, янги биноларнинг сейсмик чидамлилиги ва қурилишдаги назорат юзасидан берилган депутатлар саволларига жавоб берди.

Вазирнинг айтишича, барча қурилиш лойиҳалари Қурилишда назорат инспекциясидан рўйхатдан ўтказилиши ва “Шаффоф қурилиш” тизимига киритилиши шарт. Тизимга вазирлик сайти орқали кириб (open-data.mc.uz), қурилиш лойиҳасининг ҳужжатлари ҳақида маълумот олиш мумкин.

“Объектнинг инспекциядан рўйхатдан ўтказилгани унинг ишончлилигини англатади. Бу унинг давлат баҳолашидан ўтганини билдиради. Экспертиза сейсмик хавфсизликни назорат қилади. Сўнг инспекторлар лойиҳа доирасидаги қурилиш ишларининг тўғри бажарилишини кузатади. Шунинг учун жамоатчилик объект Қурилиш назорати инспекциясидан рўйхатдан ўтганини текшириши етарли, бу ҳолатда хавфсизлик билан боғлиқ муаммолар бўлмайди”, – деди Ҳидоятов.

Вазирликнинг лойиҳа фаолиятини мувофиқлаштириш бошқармаси бошлиғи ўринбосари Рустам Қўчқоровнинг қўшимча қилишича, Ўзбекистондаги 112 мингдан ортиқ кўп қаватли уйларнинг сейсмик чидамлилиги ўрганилган, шунинг 88 фоизи сейсмик жиҳатдан барқарор деб топилган. Қолганида инструментал ва техник ўрганишлар ўтказиш белгиланган, уларнинг натижаларига кўра қўшимча чоралар кўрилади.

Шунингдек, сейсмик чидамлиликни ошириш учун меъёрий ҳужжатлар такомиллаштирилиши кутилмоқда. Бу бўйича янги шаҳарсозлик стандарти – ШНҚ 2.01.06−25 “Сейсмик ҳудудларда кўп қаватли биноларни лойиҳалаш” ишлаб чиқилган.

“Оддий фуқаро буни қандай тушунсин?”

Жамоатчилик фаоли Шуҳрат Қурбоновнинг ёзишича, “Шаффоф қурилиш” электрон тизими одамларнинг фойдаланиши ва тушуниши учун мураккаб. У ўзи порталга кириб кўргани, лекин ҳеч нарсани тушунмаганини айтди.

“Таклиф яхши. Мен шу сайтга кирдим ва энг яқин объектни танлаб, қурилиш қонунийми ёки йўқ – тушунишга уриндим, ва… ҳеч нарсани тушунмадим.

Сайтни ўзингиз ва мутахассислар учун яратиш жуда яхши, албатта. Лекин оддий одам қурилаётган уйнинг (ундаги квартиралар аллақачон сотилмоқда) рўйхатдан ўтгани ёки йўқлиги, ҳаммаси қонунуний ёки ундай эмаслигини қандай қилиб тушунади? У ерда нега “ўтмаган” деб ёзилган; 3 та ҳужжатдан 1 таси бор бўлса, бу яхши деганими; ёки 2 таси бўлса ҳам ёмонми?” – дейди у.

Қурбонов портални фойдаланувчилар учун қулай ва содда шаклга келтиришга чақириб, оддий таклифни илгари сурди: агар қурилишда ҳаммаси жойида бўлса, яшил рангда кўрсатиш, муаммо бўлса, қизилда белгилаб, пастида муаммонинг сабабини ёзиб қўйиш мақсадга мувофиқ.