АПЛда пойга қизимоқда. Кун ўйинлари

«Ноттингҳэм Форест» – «Манчестер Сити» 1:2
Голлар: Рейндерс, 48 (0:1). Ҳатчинсон, 54 (1:1). Шерки, 83 (1:2)
«Ноттингҳэм Форест»: Жон Виктор, Мурило, Миленкович, Уилямс, Савона, Андерсон, Домингес (Авонийи, 87), Гиббс-Уайт, Ҳадсон-Одои (Баква, 90+2), Ҳатчинсон, Игор Жезус
«Манчестер Сити»: Доннарумма, Рубен Диаш, Гвардиол, О`Райли, Матеус Нунес, Гонсалес, Рейндерс (Савио, 73), Бернарду Силва, Шерки (Аке, 89), Фоден, Ҳоланд
Огоҳлантиришлар: Андерсон, 43 – Рубен Диаш, 36. О`Райли, 59

Турнинг шанба кунги дастурини чемпионлик пойгаси иштирокчиларидан бирининг ўйини очиб берди, аммо Ноттингҳэмда ўтган ўйиннинг биринчи бўлимида «Манчестер Сити» умуман ўз даражасига мос эмасди. 45 дақиқа давомида жамоалар дарвоза соҳасига тўғри борган бирорта зарба йўллай олмади, бунақаси «шаҳарликлар» иштирокидаги ўйинларда уч ўйиндан буён кузатилмаганди.

Иккинчи бўлим бошида «Сити» бир киши кам бўлиб қолиши ҳам мумкин эди, Рубен Диашга жарима майдони яқинидаги қўполлиги учун иккинчи сариқ карточка кўрсатилиши керак эди, аммо ўйин бош ҳаками Роберт Жонс уни кечирди.

Шундан кейин эса «Сити» ҳисобни очди. Шерки нозик узатма билан Рейндерсни олдинга ташлаб, ҳисоб очилишида асосий ишни бажарди. Кейин эса ушбу французнинг бурчакдан зарбаси ўта хавфли чиқди. Ҳозирда у ва Бруну Фернандеш еттитадан голли узатма билан АПЛда энг яхши ассистент бўлиб туришибди.

Аммо ҳисобдаги устунлик тезда бой берилди, мезбонлар қарши ҳужумда ҳисобни тенглаштиришди, бу ҳужумда Гиббс-Уайт Игор Жезуснинг қанотдан олдинга юришини ўз вақтида пайқади, бразилиялик ҳужумчи эса тўпни «Сити» жарима майдонига етказди. Ҳатчинсон ҳеч қандай қаршиликка учрамасдан «Ноттингҳэм» сафидаги илк голини урди.

Шундан кейин «Сити» ташаббусни қўлга олди ва тўпга эгалик қилиш бўйича катта устунликка (73 фоиз) эга бўлиб, ғалаба голини уриб кетишга ҳаракат қилди. Ва мақсадига эришди. 83-дақиқада бурчак зарбасидан кейин тўп жарима майдонида бўш қолдирилган Шеркига келиб тушди ва бурчак томон идеал зарба берди. «Форест» устози дарҳол иккинчи ҳужумчи Авонийини майдонга туширди, аммо бу ёрдам бермади.

Шу тариқа, «Сити» барча турнирлар доирасида қаторасига саккизинчи ғалабасига эришди ва яна (вақтинча) АПЛ турнир жадвалида биринчи ўринга қайтди.

«Арсенал» – «Брайтон» 2:1
Голлар: Эдегор, 14 (1:0). Рюттер, 52 – автогол (2:0). Гомес, 64 (2:1)
«Арсенал»: Райя, Салиба, Инкапие, Льюис-Скелли (Габриэл Магаляйнс, 71), Райс, Субименди, Эдегор, Мерино, Троссар (Мартинелли, 82), Сака, Йокереш (Габриэл Жезус, 71)
«Брайтон»: Вербрюгген, Данк, Коппола (Уотсон, 87), ван Ҳекке, Ҳиншелвуд (Уэлбек, 75), Айяри, Де Кейпер (Виффер, 46), Ферди Кадиўғли, Груда (Минте, 46), Гомес (Костулас, 87), Рюттер
Огоҳлантиришлар: Люис-Скелли, 69. Инкапие, 90 – Вербрюгген, 45. Данк, 50. Коппола, 56

Бир неча соат ўтиб эса «канонирлар» бу ўринни қайтариб олди. Артета шогирдлари «Сити»нинг босимини деярли ҳис қилишмаяпти ва ўз ўйинларида ғалаба қозонишда давом этишмоқда. Таркибдаги муаммоларга қарамай (Тимбер ўйинга тайёр эмасди, Калафиори эса чигалёзди машғулотлари чоғида ўзини ёмон ҳис қилиб сафдан чиқди),

«Брайтон» дарвозаси илк дақиқалардан шиддатли босим остида қолди. Шундай ҳужумлардан бири Эдегорнинг узоқ масофадан йўллаган аниқ зарбаси билан якунланди. Норвегиялик ҳужумчи тўпни ерлатиб дарвоза тўрига йўллади ва жамоасининг чемпионат жорий мавсумида гол урган 12-футболчисига айланди. Саканинг голли паси эса унинг АПЛдаги 104-голли ҳаракати бўлди. Лондонликларнинг «еттинчи» рақами бу орқали Робер Пиреснинг натижасини яхшилади.

Бундан ташқари, Букайо энди «Арсенал»нинг АПЛдаги энг яхши ассистентлари (47 голли узатма) рўйхатида бешинчи ўринга чиқди. У Аарон Рэмсини ортда қолдирди. Олдинда – Деннис Бергкамп (94), Тиерри Анри (74), Сеск Фабрегас (70) ва Месут Ўзил (54). Сака ҳали 24 ёшда экани ҳисобга олинса, у юзлик довонни забт этадиган илк футболчи бўлиши мумкин.

Умуман, лондонликлар ўйиннинг биринчи бўлимида рақиб дарвозаси томон 25 та зарба йўллади, меҳмонларда эса бирорта зарба бўлмади.

Иккинчи бўлим бошида эса Райснинг бурчак зарбасидан кейин меҳмонлар ҳужумчиси Рюттер ўз жамоаси дарвозасини ишғол этиб қўйди. Қизиқ жиҳати, Микел Артета жамоасининг сўнгги тўрт ўйинда урган олти голи протоколларга автогол сифатида ёзилган.

Ҳисоб 2:0 кўринишига келгач, ўйин тақдири ҳал бўлгандек кўринганди, аммо «Арсенал» мухлислари ўйиннинг охирини ҳаяжон ичида кузатишга мажбур бўлишди. Аввалига Гомес устундан қайтган тўпни дарвоза тўрига йўллаб, ҳисобни қисқартирди. Кейин эса Райя Минтенинг зарбасидан кейин фантастик сейв ижро этишига тўғри келди.

Шундан кейин Артета янги футболчилар тушириш орқали ўйин тизгинини ўз қўлига олди ва ғалабали ҳисоб сақланиб қолди. Энди 31 декабрга ўтар кечаси «Эмирейтс»да «Астон Вилла» меҳмон бўлади, янги йилнинг илк ҳафталарида «Борнмут»га қарши сафар (4 январ) ва Лондонда «Ливерпул» билан жанг (8 январ) кутмоқда.

«Ливерпул» – «Вулверҳэмптон» 2:1
Голлар: Гравенберҳ, 41 (1:0). Вирц, 42 (2:0). С. Буэно, 51 (2:1)
«Ливерпул»: Алиссон, ван Дейк, Конате, Керкез, Фримпонг, Жонс, Гравенберҳ, Макаллистер, Вирц (Ниони, 90+3), Киеза (Брэдли, 61), Экитике (Гакпо, 86)
«Вулверҳэмптон»: Жозе Са, С. Буэно, Крейчи, Москера (Ариас, 79), Андре, Гомес, У. Буэно (Волфе, 62), Доэрти (Чачуа, 62), Ҳванг Ҳи Чҳанг (Ларсен, 62), Мане, Арокодаре
Огоҳлантириш: Андре, 56

Одатда клублар мавсум қизиган паллада футболчилари Африка кубогига йўл олишидан норозилик билдиради. Лекин бу мавсум «Ливерпул»да ундай эмас, Арне Слот энди таркиб танлашда анча эркин қарорлар қилмоқда ва Салоҳ ҳақидаги адоқсиз саволларга жавоб бериш мажбуриятидан қутулган. Жамоа мисрлик ҳужумчисиз ўйнашга кўникиб олди. Қолаверса, ўз уйида «Вулверҳэмптон»га қарши ўйинда жиддий муаммо кутилмаётганди ҳам. «Энфилд»даги ўйинда жамоанинг собиқ футболчиси Диогу Жота яна бир бор хотирланди ва футболчилар унинг фарзандлари ва кичик ёшдаги қариндошларини майдонга етаклаб чиқишди.

Бўлим охирларида Гравенберҳ ҳисобни очганида голни собиқ жамоадоши услубида нишонлади. Бир дақиқа ўтиб Гравенберҳ Вирцнинг АПЛда узоқ кутилган голига ҳаммуаллифлик қилди. Бу воқеани 17 тур кутишга тўғри келди, немис футболчисининг Англия чемпионатидаги 21-зарбаси ниҳоят голга айланди.

«Ливерпул» эса қаторасига уч ғалабадан кейин турнир жадвалининг тўртинчи ўрнига кўтарилиб олди, аммо пешқадам билан орадаги фарқ 10 очкони ташкил этмоқда.

«Челси» – «Астон Вилла» 1:2
Голлар: Жоао Педро, 37 (1:0). Уоткинс, 63 (1:1). Уоткинс, 84 (1:2)
«Челси»: Санчес, Бадиашиле, Чалоба, Кукуреля (Гюсто, 69), Жеймс, Фернандес, Кайседо, Палмер (Эстевао, 72), Гарначо (Делап, 69), Педру Нету, Жоао Педро (Гиттенс, 69)
«Астон Вилла»: Мартинес, Линделёф, Конса, Матсен (Дин, 83), Кэш, Тилеманс, Камара (Богард, 83), Буэндия (Уоткинс, 58), Роджерс, Макгинн (Онана, 59), Мален (Санчо, 59)
Огоҳлантиришлар: Жеймс, 57. Чалоба, 68. Кайседо, 71. Делап, 71. Фернандес, 90 – Кэш, 30. Роджерс, 57. Камара, 78

Бироз ўтиб Лондонда турнинг марказий баҳси бўлиб ўтди. Бу ўйин арафасида турнир жадвалининг учинчи поғонасида турган «Астон Вилла» «Челси» меҳмони бўлди. Ўйиннинг биринчи бўлими мезбонларнинг тўлиқ устунлиги остида кечди (тўп назорати 71-29, зарбалар бўйича 10:0, xG бўйича 1,98-0,00) ва бўлим охирларида Жеймснинг бурчакдан узатмасидан кейин Жоао Педро ҳисобни очди.

Иккинчи бўлимда эса барчаси 180 даражага ўзгариб кетди, биринчи бўлимда зерикиб қолган Санчес супермен режимини ёқишига тўғри келди.

Дарвозабон яккама-якка вазиятга чиқиб келган Камаранинг зарбасини ва Роджерс яқин бурчакка йўллаган тўпни қайтарди, аммо бу вазиятлар орасида бир зарбани ўтказиб юборди. «Челси» футболчилари ҳимоядан чиқишда хатога йўл қўйди, майдон марказида эгаллаб олинган тўп Роджерсга етказилди ва у Уоткинсни идеал позицияга чиқарди. 59-дақиқада Мален ўрнига туширилган Олли шу куни идеал жокерга айланди ва кўп ўтмай Тилеманснинг бурчакдан узатмасидан кейин ғалаба голини ҳам урди.

«Вилла» барча турнирлар доирасида қаторасига ўн биринчи ғалабага эришиб, «Арсенал» билан уч очколик фарқни сақлаб қолди. Тўртинчи ўринни «Ливерпул»га бўшатиб берган «Челси»да эса тизимли муаммолар кузатилмоқда: Энцо Мареска жамоаси ҳисобда олдинда борган ўйинларида 13 очко йўқотишга улгурди. Таққослаш учун, бирмингҳэмликлар ҳисобда ортда борган ўйинларида ирода кўрсатиб, 18 очко олишган.