Енгил автомобил импортида электромобиллар улуши 70 фоиздан ошди

2025 йилда Ўзбекистонга импорт қилинган ҳар 10 та енгил автомобилдан 7 тасини фақат электрда ҳаракатланадиган уловлар ташкил этди. Бу – Kun.uz эътибор қаратган божхона статистикасидан маълум бўлди.

Божхона қўмитаси сайтидаги маълумотларга кўра, 2025 йилда Ўзбекистонга 56 832 та электромобил импорт қилинган. Бу – 2024 йилдагига нисбатан 136 фоиз (қарийб 2,4 баробар)га кўп.

2024 йилда хориждан олиб кирилган электромобилларнинг жами божхона қиймати 224,7 млн долларни ташкил этган бўлса, 2025 йилда бу кўрсаткич 701 млн долларга етди.

• Бунда нафақат импорт ҳажмининг ошиши, балки нисбатан қимматроқ моделлар олиб кирилаётгани ҳам рол ўйнаган: 2024 йилда импорт электромобилларнинг ўртача божхона қиймати 9330 доллар эди, 2025 йилда бу қиймат 12 340 долларни ташкил этди.

2025 йилда бензинда ҳаракатланувчи 19 871 та автомобил олиб кирилди, бу – бир йил олдингидан 40 фоизга кам.

Натижада енгил автомобил импортида электромобиллар улуши 71,2 фоизга етган. Бир йил олдин бу кўрсаткич 32,3 фоиз эди.

• Бензинда юрадиган “иномарка”ларнинг ўртача божхона қиймати 2024 йилдаги 21 475 доллардан 2025 йилда 19 525 долларгача пасайди.

Шунингдек, гибрид автомобиллар импорти 83 фоизга қисқариб, 2024 йилдаги 17 480 тадан 2025 йилда 3017 тага тушиб қолди.

Эслатиб ўтамиз, 2026 йил 1 январдан бошлаб, кам литражли автомобиллар импорти учун божлар ошди.

Аввалроқ 2025 йил якунлари бўйича BYD компанияси дунё миқёсида электромобил сотувлари бўйича Tesla'дан ўзиб кетгани хабар қилинганди.