Юлдуз Усмонованинг АҚШда бекор бўлган концерти ва 10 минг долларга ёлланган киллер – маҳаллий дайжест

Исроилни қоралаб, Фаластинни қўллаб-қувватлаган Юлдуз Усмонованинг АҚШдаги концерти бекор қилинди. Тошкент учун янги аэропорт қурилгач, эскиси ёпилиши маълум қилинди. Хотинини ўлдириш учун 10 минг долларга киллер ёллаган эркак ушланди. Тиббий маълумотномани онлайн олиш имконияти яратилди.

Исроилни қоралаган Юлдуз Усмонованинг АҚШдаги концерти бекор қилинди

Ўзбекистон халқ артисти Юлдуз Усмонованинг 9 май куни Ню Йорк (АҚШ) шаҳрида ўтиши белгиланган концерти бекор қилинди. Бу ҳақда 4 май куни тадбир мезбони Oceana театри хабар берди.

Концертнинг бекор қилиниши – маҳаллий сиёсатчилар томонидан қўллаб-қувватланган қаршилик кампанияси ортидан рўй берди. Юлдуз Усмонова Фаластинни қўллаб, Исроилнинг ҳаракатларини кескин танқид қилиб келгани туфайли антисемитизмда айбланмоқда.

Юлдуз Усмонова 5 май куни берган изоҳида концерт учун барча чипталар сотиб бўлинганини айтиб, бунинг учун мухлисларига миннатдорлик билдирди. Концерт бекор қилингани ҳақида гапираркан, хонанда ўз қарашларида собит эканини таъкидлади.

Тошкент учун янги аэропорт қурилгач, эскиси ёпилади

Тошкент шаҳри учун янги халқаро аэропорт қурилишини шу йил июл ойида бошлаш режалаштирилмоқда. Янги аэропорт очилгач, ҳозиргиси ёпилади. Транспорт вазири ўринбосари Жасурбек Чориев сўзларига кўра, «концептуал ечим» бор, агар янгиси очилса, эскисини ёпиш керак.

Тошкент шаҳри учун янги халқаро аэропорт Тошкент вилоятининг Ўрта Чирчиқ ва Қуйи Чирчиқ туманлари ҳудудида, 1300 гектар майдонда қурилади. Шавкат Мирзиёев 2025 йил 15 октябр куни қурилишга старт берган эди.

Расмийларга кўра, 2017-2025 йилларда пойтахтга авиайўловчилар оқими 3 карра ошиб, йилига 9 миллионга етган. 2040 йилга бориб, 24 миллиондан ошади. Лекин йилига 11 миллион одамга хизмат кўрсатадиган ҳозирги аэропорт шаҳар ҳудудида жойлашгани учун уни кенгайтиришнинг имконияти йўқ.

Хотинини ўлдириш учун 10 минг долларга киллер ёллаган эркак ушланди

Тошкент шаҳрида шаръий никоҳдаги хотинини ўлдириш учун 10 минг долларга қотил ёллаган эркак қўлга олинди. Пойтахт ИИББ хабарига кўра, у қотилликни амалга ошириш учун танишига олдиндан 2 минг доллар берган. Буюртмачи ёлланма қотилга аёлнинг яшаш манзили, хонадон рақами, автомобили, кимлар билан яшаши, қачон уйга кириб-чиқиши ҳақида батафсил маълумотларни тақдим этган.

20 апрель куни ўтказилган тезкор тадбирда ёлланма қотил буюртмачи билан учрашиб, унга хотини ўлдирилгани ҳақида хабар берган. Бу хабарни эшитган эркак 6,5 миллион сўм ҳамда жабрланувчи номидаги Tracker автомобилини топширган вақтида ашёвий далиллар билан қўлга олинган.

Тиббий маълумотномани онлайн олиш имконияти яратилди

Маълумотномани олиш учун фойдаланувчи my.gov.uz порталига кириб, «Соғлиқни сақлаш» бўлимига ўтиши, «086-шаклдаги тиббий маълумотномани олиш» хизматини танлаши ва тайёр ҳужжатни юклаб олиши керак.

Илгари ушбу ҳужжатни олиш учун тиббиёт муассасасига бориш ва навбатда туриш талаб этилган бўлса, энди бу жараён рақамлаштирилди.

Муҳим эслатма: маълумотнома порталда шаклланиши учун фуқаро аввал тегишли тиббиёт муассасасида шифокорлар кўригидан ўтган бўлиши лозим. Шифокорлар хулосаси базага киритилгач, ҳужжатни масофадан туриб олиш мумкин. Хизматдан фойдаланиш мутлақо бепул ва ҳеч қандай ҳужжат талаб этилмайди.