Олтиндан ташқари экспорт ҳажми қарийб 29 фоизга ошди. Тошкентда “ақлли” транспорт тизимини жорий этиш режалаштирилмоқда, Оҳангаронда эса поезд релсдан чиқиб кетди. Қашқадарёда ўзини давлат билан тенглаштирган амалдорнинг фуқарога таҳдид қилгани акс этган видео эса кенг муҳокамаларга сабаб бўлди. Шу ва бошқа маҳаллий янгиликлар билан Kun.uz дайжестида таништирамиз.
Олтиндан ташқари экспорт қарийб 29 фоизга ошди
Миллий статистика қўмитаси маълумотларига кўра, 2026 йилнинг январ-июн ойларида Ўзбекистоннинг ташқи савдо айланмаси 41 миллиард АҚШ долларини ташкил этди. Шу даврда экспорт 15,9 миллиард доллар, импорт эса 25,1 миллиард долларга етди.
Шу билан бирга, олтин ҳисобга олинмаган ҳолда товарлар экспорти 8,2 миллиард АҚШ долларини ташкил этиб, ўтган йилнинг мос даврига нисбатан 28,7 фоизга ошди. Бу нохомашё экспорти ўсишда давом этаётганини кўрсатади.
Ҳисобот даврида Ўзбекистон 195 та давлат билан ташқи савдо алоқаларини амалга оширган. Энг катта улуш Хитой ҳиссасига тўғри келган бўлса, кейинги ўринларни Россия, Қозоғистон, Туркия ва Афғонистон эгаллаган.
Тошкентда «ақлли» транспорт тизими жорий этилади
Тошкент шаҳрида транспорт ҳаракатини самарали бошқариш ва тирбандликни камайтириш мақсадида интеллектуал транспорт тизимини жорий этиш режалаштирилмоқда. Бу борада Германия мутахассислари иштирокида техник топшириқ ишлаб чиқилган, адаптив светофорлар ва сунъий интеллект технологияларини қўллаш юзасидан халқаро компаниялар билан музокаралар олиб борилмоқда.
Шунингдек, шаҳарда йўл ўтказгичлари, тоннеллар, BRT йўлаклари ва икки қаватли Тошкент ҳалқа пулли автомобил йўли каби йирик инфратузилма лойиҳаларини амалга ошириш ишлари давом этмоқда. Жамоат транспорти учун алоҳида йўлаклар ташкил этиш ва автобус бекатларини янгилаш ҳам режага киритилган.
Маълум қилинишича, тирбандлик юқори бўлган чорраҳаларда ҳаракатни яхшилаш чоралари кўрилган, минглаб замонавий светофор ва йўл белгилари ўрнатилган.
Оҳангаронда поезд релсдан чиқиб кетди
Тошкент вилоятининг Оҳангарон туманида манёвр тепловози ва тўртта цистерна вагон релсдан чиқиб кетди.
«Ўзбекистон темирйўллари» маълум қилишича, поезд «ЛУКОЙЛ»га тегишли шохобча йўлидаги стрелкали ўтказгичдан ўтаётган вақтда релсдан чиққан. Компания ушбу темирйўл тармоғи ўз тасарруфига кирмаслигини билдирган.
Мутахассислар иштирокида поезд ва вагонлар ўша куннинг ўзида қайта релсга ўрнатилган. Ҳодиса оқибатида жабрланганлар йўқ, атроф муҳитга ҳам зарар етмаган.
Қашқадарёда амалдор фуқарони “оёғининг тагига олмоқчи” бўлди
Косон туманида мансабдор ва фуқаро ўртасидаги тортишув акс этган видео тарқалди. Унда амалдор фуқарони ҳақоратлаб, “Сан ман билан ўйнадингми, давлат билан?!”, “Оёғимнинг тагига оламан”, дея таҳдид қилаётгани акс этган.
Видеодаги шахс Ўзбекистон маҳаллалари уюшмасининг Косон тумани бўлими бошлиғи Убайдулла Очилов бўлиб, можаро фуқародан кўчага тўкилган қумни олиб ташлаш талаб қилинганидан сўнг келиб чиққан.
Ҳолат юзасидан Ўзбекистон маҳаллалари уюшмаси расмий муносабат билдириб, бундай муомала давлат хизматчиси одоб-ахлоқ меъёрларига мутлақо зид эканини маълум қилди. Уюшмага кўра, ҳозирда хизмат текшируви ўтказилмоқда ва унинг якунлари бўйича қонунчилик доирасида тегишли чоралар кўрилади.
Бухоро ва Қашқадарёда ер масаласидаги коррупция ҳолатлари фош этилди
Бухоро ва Қашқадарё вилоятларида ер майдонларини расмийлаштириш билан боғлиқ коррупция ҳолатларига чек қўйилди.
Бухорода Кадастрлар палатаси бўлим бошлиғи Ромитан туманида ўзбошимчалик билан қурилган бино ва унга туташ ер майдонини фуқаро номига расмийлаштириб бериш эвазига 2,5 минг АҚШ доллари олган вақтида ушланди.
Қашқадарёда эса Кўкдала тумани инвестициялар, саноат ва савдо бўлими бош мутахассиси 1 сотих ер учун кадастр ҳужжатларини тайёрлатиб, давлат рўйхатидан ўтказиб беришни ваъда қилиб, бунинг эвазига минг АҚШ доллари олган вақтида қўлга олинди.
Болаларга нисбатан зўравонлик учун 1246 колл-маркази ишга тушди
Болаларнинг ҳаёти ва соғлиғига таҳдид солувчи ҳолатлар ҳақида хабар бериш учун 1246 қисқа рақамли колл-марказ ишга туширилди. Айни пайтда у синов режимида фаолият юритмоқда.
Ижтимоий ҳимоя миллий агентлиги маълум қилишича, мазкур рақам орқали болага нисбатан жисмоний, руҳий ёки жинсий зўравонлик, бепарволик, шафқатсиз муносабат ҳамда унинг ҳаёти ва соғлиғига хавф туғдирувчи бошқа ҳолатлар ҳақида мурожаат қилиш мумкин.
Агентликка кўра, колл-марказга мурожаат қилувчиларнинг шахси сир сақланиши кафолатланади.
