AIBA prezidenti mansabidan vaqtincha iste'foga chiqqan G‘ofur Rahimov bu lavozimni butkul tark etishi mumkin. Payshanba kuni AIBA Ijroiya Qo‘mitasi tashkilot Nizomiga o‘zgartirish kiritish orqali uning bu postga qaytish huquqini bekor qildi, deb xabar bermoqda «RIA Novosti» Ijroqo‘mning rossiyalik a'zosi Umar Kremlevga asoslangan holda.
Xabarda aytilishicha, Ijroqo‘m Rahimovga xat yo‘llab, uni tashkilot prezidenti lavozimidan butkul iste'fo berishga chaqirgan.
AIBA Ijroqo‘mi, shuningdek, 15 noyabr kuni Lozannada navbatdan tashqari Kongress o‘tkazish va unda tashkilotga yangi rahbarlar saylash taklifini yoqlab ovoz bergan.
Mazkur qarorlar Xalqaro Olimpiya Qo‘mitasi AIBA`ni Olimpiadaning boks bo‘yicha musobaqalaridan chetlashtirgani fonida qabul qilinmoqda.
Seshanba kuni XOQ AIBA`dagi moliyaviy muammolar va uning rahbariyati bilan bog‘liq mojaro sababli jahon havaskor boksining bosh tashkilotini Olimpiadaning boks turniri va unga saralash musobaqalarini tashkil etish vakolatidan mahrum etgan edi. Chorshanbada esa AIBA`ning XOQga a'zoligi to‘xtatib qo‘yildi.
Reuters ma'lumotiga ko‘ra, Xalqaro Boks Assotsiatsiyasi 16 mln dollar qarzga botgan.
AIBA Ijroqo‘mi a'zosi, Rossiya boks federatsiyasi bosh kotibi Umar Kremlev mazkur muammolarni bartaraf etishni va'da qilgan G‘ofur Rahimovni yolg‘onchilikda aybladi.
«Bugun biz birlashib, jiddiy qarorni qabul qildik – qarzlarni yopishi va XOQ bilan til topisha olishini aytib, butun boks olamini aldagan insondan qutuldik.
G‘ofur Rahimov AIBA`ni bankrotlik yoqasiga keltirib qo‘ydi. U butun boks jamoatchiligidan uzr so‘rashi kerak.
Bugun u qayta olmasligi uchun Nizomdan tegishli bandni chiqarib tashladik va 15 noyabr kuni Kongress majlisini chaqirishga qaror qildik. Unda AIBA`ga yangi rahbariyatni saylaymiz», – degan Kremlevning so‘zlarini keltirdi Rossiya boks federatsiyasi matbuot xizmati.
