Foto: Senat axborot xizmati
Kecha, 9 noyabr kuni Tanzila Norboyeva raisligida o‘tgan Korrupsiyaga qarshi kurashish milliy kengashi majlisiga mustaqil ommaviy axborot vositalari taklif qilinmadi.
Senat matbuot xizmati rasmiy xabarida tadbirni OAV vakillari ham kuzatgani aytiladi. Biroq bir nechta manbalarning Kun.uz'ga tasdiqlashicha, majlisda to‘liq davlat tasarrufidagi “O‘zbekiston 24” telekanali vakillari qatnashgan xolos.
Milliy kengashda oliy ta'lim va qurilish vazirlarining sohada korrupsiyaga qarshi kurash bo‘yicha hisobotlari eshitilgan. Bu hisobotlar ham jamoatchilik uchun e'lon qilinmagan.
“Majlisda oliy va o‘rta maxsus ta'lim hamda qurilish vazirlarining hisobotlari eshitilib, oliy ta'lim va kapital qurilish sohalarini “korrupsiyasiz soha”ga aylantirish bo‘yicha 2022-2023 yillarga mo‘ljallangan “yo‘l xaritasi”ni ishlab chiqish vazifasi topshirildi”, – deyilgan rasmiy relizda.
Foto: Senat axborot xizmati
Kun.uz muxbirining savoliga javoban, Senat matbuot xizmati rahbari Mo‘min Ibodov Senatning hozirgi zalida ko‘proq jurnalist chaqirish imkoniyati yo‘qligi, tashkilot yangi binoga ko‘chib o‘tganda sharoitlar ancha yaxshilanishini ma'lum qildi.
U, shuningdek, vazirlarning hisobotlari OAVga berilmasligini bildirdi.
