«Масала ҳал» – Тошкент метрополитени поезднинг ёпилмаган эшиклари учун узр сўради

Тошкент метросида Чилонзор йўналишида поезд «Пушкин» бекатидан «Буюк ипак йўли» бекатигача эшикни ёпмай ҳаракатлангани тўғрисида видеолавҳа тарқалди. Видеода ҳаракат пайтида таркибдаги камида битта эшик очиқ қолгани, очиқ эшик ёнида бир неча йўловчилар турганини кўриш мумкин.

«Ўзбекистон темир йўллари» АЖнинг Telegram каналида ҳолат юзасидан рус тилида изоҳ қолдирилди.

«Мазкур вазият куни кеча соат 18:40да «Пушкин» ва «Буюк Ипак Йўли» бекатлари оралиғида рўй берган. «Буюк Ипак Йўли» бекатига етиб келгандан кейин бу носозлик бартараф этилган ва состав штат режимида ишлашда давом этган.

Муҳтарам йўловчилар! Ҳаракатланувчи составнинг эшиклари автоматик ёпилиш тизимига эга. Метрополитеннинг ҳар бир ҳаракатдаги составида эшикларнинг локомотив сигнализацияси бор ва у очиқ эшиклар билан ҳаракатланишнинг олдини олади. Лекин эшиклар ёпилишига сунъий тўсиқ қўйилса ёки ёпиш механизмига бегона жисмлар тушиб қолса, автоматик ёпиш тизими ишламай қолади. Яъни бундай ҳолатларда эшикларнинг пневматик магистрали ўчади.

Йўловчилардан вагонларда фавқулодда ҳолатлар юз берганда ҳар бир вагонда иккитадан бўлган «йўловчи-машинист» алоқа тизими орқали хабар беришни сўраймиз. Шунингдек, эшикларга суянмаслик, уларнинг ҳаракатига тўсқинлик қилмаслик, автоёпилиш жараёнида уларни тутиб турмаслик сўралади. Йўловчилар вагонга кириб олиш ёки кимгадир киришга ёрдам бериш мақсадида кўп ҳолларда автоматик камарларни тутиб қолишади. Бунинг натижасида состав белгиланган муддатдан кўпроқ ушланиб қолади.

«Тошкент метрополитени» ДУК раҳбарияти рўй берган ҳолат бўйича узр сўрайди ва айни пайтда бу борада хизмат текшируви ўтказилаётгани, вагон ичи ва бекатлардаги видеокузатув камералари ёзувлари ўрганилаётганини маълум қилади», – дейилади расмий изоҳда.

Метрополитеннинг расмий изоҳида барча айбни йўловчиларга юклаш иштиёқи сезилиб туради. Аммо нега деярли 45 йиллик фаолият давомида бундай ҳолатлар устма-уст кузатилмаганига оид бирор сўз йўқ?

Вазиятни осонгина узр сўраш билан хаспўшлаш, қатор ҳолатларнинг асл сабаблари бўйича тушунарли ахборот бермаслик, энг муҳими фавқулодда ҳолатларнинг олдини олиш юзасидан аниқ бир режага эга эмаслик бугунги кун метрополитен тизимига берилган баҳо бўла олади.

Эслатиб ўтамиз, бу сўнгги бир ой ичида рўй берган тўртинчи нохуш ҳолатдир.

18 март куни метронинг ер усти Сергели йўналиши бошланиш жойида икки поезд тўқнашиб кетган эди. Тўхтаб қолган таркибга ортидан келган бошқа бир таркиб келиб урилган.

7 апрел куни эса Ўзбекистон йўлининг «Ғафур Ғулом» бекатида поезд техник сабабларга кўра тўхтаб қолди, натижада йўловчилар бошқа таркибга кўчирилди, юрмай қолган поездни бошқа бир поезд шатакка олишига тўғри келди.

8 апрел куни эса қурилганига бир йил бўлмаган Сергели йўналишида авариявий ҳолат рўй берди: контакт рельсининг кронштейнлари чиқиб кетди, натижада вагонлардаги йўловчилар ер усти метроси бўйлаб пиёда кетишларига тўғри келди. Йўналишдаги қатнов 6 соатга тўхтаб қолди.

Аброр Зоҳидов