«Украинадаги ҳар кунги реаллик» ва Бахмутда окоп қазиётган жангчилар. Уруш суратлари

Украинада урушнинг 343-куни ўтди. Асосий маълумотлар: 

• Россия қўшини Краматорск шаҳри марказини ўққа тутди. Ракета турар жой биносини вайрон қилган, тинч аҳоли вакилларидан уч киши ҳалок бўлиб, яна 18 киши жароҳатланган. Президент Зеленский Краматорск ўққа тутилиши оқибатларини «мамлакатнинг ҳар кунги реаллиги» деб атади.
• АҚШ Украинага 150 километр масофага ҳаракатланувчи GLSDB (Ground Launched Small Diameter Bomb) ракеталарини тақдим этади. Ракеталар 2 миллиард долларлик янги ҳарбий ёрдам пакетида бўлади, бу ҳақда шу кунларда эълон қилиниши кутилмоқда.
• Украинага Австрия президенти Александр Ван дер Беллен ташриф буюрди. У Бучада бўлди ва Киевда Володимир Зеленский билан учрашди. Ван дер Беллен Австриянинг нейтрал мақоми ва Қуролли кучлар бюджетидаги тежамкорлик сиёсати Австрия Украинага қурол етказиб беришига имкон бермаслигини, шу билан бирга ушбу мамлакат «урушни якунлашнинг барча дипломатик йўлларини қўллаб-қувватлаши»ни билдирди.
• Евгений Пригожин «Вагнер» ХҲК жангчилари Донецк областининг уч киши яшовчи Сакко ва Ванцетти қишлоғини эгаллаганини маълум қилди. Россия мудофаа вазирлиги ва Украина ҳукумати бу баёнотга муносабат билдирмаган.
• АҚШ Америка-Россия инвестиция фондидан Украинани қўллаб-қувватлаш учун 135 миллион доллар ажратди.

Краматорск марказига зарба 

1 феврал куни кечқурун Россия қўшини Украина назоратидаги Краматорск шаҳрига зарба йўллади. Украина миллий полициясига кўра, шаҳар марказида камида саккизта кўп қаватли уйлар шикастланган. Уч киши ҳалок бўлиб, 18 киши яралангани маълум.

Володимир Зеленский ушбу ҳодиса айбдорларига «шафқат қилинмаслиги»ни маълум қилди. РФ мудофаа вазирлиги ҳозирча ушбу шаҳар бўйлаб берилган зарбаларга муносабат билдирмади. Қуйида ушбу ҳужум оқибатлари акс этган кадрлар.