Харкивда университет ва кўп қаватли уй ўққа тутилди. Уруш суратлари

Украинада урушнинг 347-куни ўтди. Асосий маълумотлар:

WSJ Россия ва Эрон Татаристонда Эроннинг Shahed-136 камикадзе дронларини ишлаб чиқарувчи завод қуришни режалаштираётгани ҳақида хабар берди.
«Руси сидящей» ташкилоти раҳбари Ольга Романова «мудофаа вазирлигидан бўлган» кишилар Кузбассдаги колониядан 50 нафар маҳбусни олиб кетишгани — ва «бу каби ҳолатлар ҳақида ҳаммаёқдан хабар келаётгани» ҳақида маълум қилди.
Украина нашрлари, шунингдек Рада депутатлари Украина мудофаа вазири Олексий Резников яқин кунлар ичида истеъфога чиқиши ҳақида хабар берди.
Одессада аҳолининг 40 фоизи нимстанциядаги авария туфайли токсиз қолди. Одессадаги ўқув муассасаларида 6 ва 7 феврал кунлари дам олиш куни деб эълон қилинди.
5 феврал куни тонгда Харкив ўққа тутилди. Украина ҳукумати ракеталардан бири турар жой биносига, бошқаси — университет биносига келиб тушгани, беш киши жабрланганини хабар қилган.
Исроилнинг собиқ бош вазири Нафтали Бенет уруш бошидаги музокаралар чоғида Владимир Путин унга Украина президенти Володимир Зеленскийни ўлдирмасликка ваъда бергани ҳақида гапирди.

Харкив ўққа тутилиши оқибатлари

5 феврал тонгида Харкив марказига ракеталар учиб келди. «Суспильне» телеканали хабар беришича, россияликлар зарбаси оқибатида беш киши яраланган. Шаҳар мэри Игор Тереховнинг маълумотига кўра, шаҳарнинг Киев районига С-300 тизимининг икки ракетаси йўлланган. Улардан бири Шаҳар хўжалиги миллий университети бош корпусининг юқори қаватига урилган. Иккинчи ракета унга яқин жойлашган тўрт қаватли уйга қулаган, жами беш киши яраланган. Шаҳар мэри Харкивнинг бу районига ҳарбийлар жойлаштирилмаганини маълум қилган.

Харкивдаги Шаҳар хўжалиги миллий университети ўққа тутилиши оқибатлари
Vitalii Hnidyi / Reuters / Scanpix / LETA

Вайрон бўлган университет олдидаги қутқарувчилар
Andrii Marienko / AP / Scanpix / LETA

5 феврал тонгида иккинчи ракета келиб тушган турар жой биноси ҳудудидаги қутқарувчилар. Снаряд бино пойдеворига тушган, аммо шаҳар мэри уй қулаши эҳтимоли йўқлигини билдирган
Vitalii Hnidyi / Reuters / Scanpix / LETA

Қутқарувчилар ва маҳаллий аҳоли вакиллари турар жойга ҳужум вақтида яраланган аёлни олиб кетишмоқда
Sofiia Gatilova / Reuters / Scanpix / LETA

Харкивлик ярадор киши ракета келиб тушган уйи олдида
Reuters / Scanpix / LETA

Ракета зарбасидан шикастланган турар жой биноси ҳудудида ишлаётган қутқарувчилар
Vitalii Hnidyi / Reuters / Scanpix / LETA

Херсон ўққа тутилиши оқибатлари

Херсонда 5 феврал тонгида икки қаватли лицей биносига зарба келиб тушган. Украина Фавқулодда вазиятлар бўйича давлат хизмати хабар беришича, лицейнинг биринчи қавати ёниб кетди. Жабрланганлар ҳақида маълумот йўқ.

Украиналик ўт ўчирувчи Херсонда 5 феврал тонгида зарбага учраган лицей биноси олдида
Libkos / AP / Scanpix / LETA

Россияликлар снаряди парчаси келиб тушган квартира деворида ҳосил бўлган ёриқ
Libkos / Scanpix / LETA

Донецк ўққа тутилиши оқибатлари

Аннексия қилинган Донецк шаҳрининг Россия томонидан тайинланган мэри Алексей Кулемзин шаҳарнинг Петровский райони ўққа тутилганини хабар қилди. Унинг сўзларига кўра, район ҳудудига 35 дақиқа ичида 155 миллиметр калибрли 24 та снаряд келиб тушган — Тихий микрорайонидаги Стаханова кўчасидаги кўп қаватли уйлардан бири шикастланган, бу ерда бир аёл ҳалок бўлган.