Pokiston va O‘zbekiston o‘rtasida yangi iqtisodiy yo‘lak – temiryo‘l quriladi

Pokiston bosh varizi Imron Xon Pokiston va O‘zbekiston o‘rtasidagi Trans-afg‘on temiryo‘l qurilishi loyihasini tasdiqladi. Ushbu loyihaga xalqaro moliya tashkilotlari tomonidan 4,8 milliard dollar jalb etilishi kutilmoqda, deb xabar bermoqda Anado‘lu agentligi.

Pokiston bosh vazirining savdo va investitsiya masalalari bo‘yicha maslahatchisi Razzoq Dovudga ko‘ra, Imron Xon 2020 yil 29 dekabrda loyihani ishga tushirish maqsadida xalqaro tashkilotlardan qarz so‘rab, xat yo‘llagan.

«Mazkur xatni imzolashda O‘zbekiston transport vaziri vazifasini bajaruvchi Ilhom Mahkamov ham ishtirok etdi. Avvalroq xat Afg‘oniston va O‘zbekiston prezidentlari tomonidan ham imzolangandi», — deyiladi agentlik xabarida.

Razzoq Dovudning aytishicha, loyihani amalga oshirish shartlari O‘zbekiston bilan kelishib olingan, ayni paytda Afg‘oniston tomoni bilan muzokara davom etmoqda.

«Men 2021 yil yanvarda O‘zbekistonga tashrif buyurishni rejalashtirganman. O‘ylaymanki, loyiha eksportlarimiz hajmini oshirishga xizmat qiladi», — deya qo‘shimcha qilgan u.

Pokiston transport vaziri Azam Xon Svatiga ko‘ra, bo‘lajak temiryo‘ldan yo‘lovchi va yuk tashish maqsadlarida foydalaniladi. Avvalroq Pokiston 2,655 km uzunlikdagi temiryo‘l qurilishi orqali Xitoy bilan iqtisodiy yo‘lak barpo etishga kirishgandi.

Prezident Shavkat Mirziyoyev parlamentga murojaatnomasida «Markaziy Osiyoni Hind okeani bilan bog‘laydigan Trans-afg‘on transport yo‘lagini barpo etish borasida dastlabki amaliy qadamlar» tashlangani haqida aytgandi.

O‘zbekiston Respublikasining shu paytgacha Misrda favqulodda va muxtor elchisi bo‘lib ishlab kelgan Oybek Orifbekovich Usmonov 2020 yil dekabrda O‘zbekiston Respublikasining Pokiston Islom Respublikasidagi favqulodda va muxtor elchisi lavozimiga tayinlangan.

2018 yildan e'tiboran Pokiston bosh vaziri lavozimida ishlab kelayotgan Imron Xon 2020 yil yakunida ilk marta Afg‘onistonga tashrif buyurib, prezident Ashraf G‘ani bilan muloqot qilgandi.