O‘zbekistonda yana 16 ta tuman hokimlarining lavozimiga loyiqligi ko‘rib chiqiladi

Shavkat Mirziyoyev uy-joy, qurilish, kommunal xo‘jaligi, transport va ekologiya sohalarida amalga oshirilgan ishlar va ustuvor vazifalar yuzasidan yig‘ilishda 16 tuman hokimlarining lavozimga loyiqligi ko‘rib chiqishni topshirdi.

Majlisda o‘tgan yili hududlarda 2 mingta ko‘p qavatli uy-joy qurib, aholiga topshirish bo‘yicha olingan reja to‘liq bajarilmay qolgani, ya’ni 124 ta uy-joy qurilishi yakunlanmagani, qurilgan uylardan 450 tasi haligacha foydalanishga topshirilmagani qayd etildi.

Bundan tashqari, uy-joyga talab yuqori bo‘lsa-da, 2023 yilda 16 ta tumanda birorta ko‘p qavatli uy-joy qurilmagani, tuman hokimlari buni reja ham qilmagani tanqid qilindi.

Shu sababli bosh vazir Abdulla Aripovga Nukus, Qorovulbozor, Navbahor, Kosonsoy, Nurobod, Oltinsoy, Muzrabot, Qiziriq, Bandixon, Oqoltin, Sayxunobod, Mirzaobod, Xovos, Piskent, Qo‘shtepa, Bog‘dod tumanlari hokimlarining lavozimiga loyiqligini ko‘rib chiqish topshirildi.

Ma’lumot uchun:

• Qoraqalpog‘istonning Nukus tumaniga 2023 yil avgustidan buyon Ziyauatdin Zaytov;
• Buxoro viloyatining Qorovulbozor tumaniga 2018 yil martidan buyon Akmal Ostonov;
• Navoiy viloyatining Navbahor tumaniga 2022 yil mayidan buyon Azamat O‘roqov;
• Namangan viloyatining Kosonsoy tumaniga 2021 yil dekabridan buyon Dilmurod Qodirov;
• Samarqand viloyatining Nurobod tumaniga 2022 yil oktyabridan buyon Sirojiddin Berdiqulov;
• Surxondaryo viloyatining Oltinsoy tumaniga 2023 yil yanvaridan buyon Bahrom Mahmatrayimov;
• Surxondaryo viloyatining Muzrabot tumaniga 2022 yil sentabridan buyon Erkin Alimov;
• Surxondaryo viloyatining Qiziriq tumaniga 2023 yil yanvaridan buyon Sherzod Rajabov;
• Surxondaryo viloyatining Bandixon tumaniga 2023 yil yanvaridan buyon Abdumalik Allamuradov;
• Sirdaryo viloyatining Oqoltin tumaniga 2023 yil iyulidan buyon Komiljon Ernazarov;
• Sirdaryo viloyatining Sayxunobod tumaniga 2023 yil noyabridan buyon Anvar Karimov;
• Sirdaryo viloyatining Mirzaobod tumaniga 2023 yil oktyabridan buyon Sarvar Sultonov;
• Sirdaryo viloyatining Xovos tumaniga 2023 yil avgustidan buyon Ulug‘bek Yo‘ldoshev;
• Toshkent viloyatining Piskent tumaniga 2023 yil yanvaridan buyon Nodirbek Yoqubov;
• Farg‘ona viloyatining Qo‘shtepa tumaniga 2018 yil iyunidan buyon Ilyosbek Valeriyevich Novikov;
• Farg‘ona viloyatining Bog‘dod tumaniga 2022 yil yanvaridan buyon Yusufjon Husayinov ishlab kelmoqda.

Bundan avvalroq Shavkat Mirziyoyev bosh vazirga Nukus, Jizzax, Bekobod shaharlari, Sharof Rashidov, Dehqonobod, Uchqo‘rg‘on, Urganch tumanlarida sanoat mahsulotlarini ishlab chiqarishda o‘sish bo‘lmagani munosabati bilan ushbu 7 ta hudud hokimlarining lavozimiga loyiqligini ko‘rib chiqishni topshirgandi.

Shuningdek, joylardagi iqtisod bo‘yicha hokim o‘rinbosarlari, viloyat va tumanlardagi iqtisodiyot bo‘limlari rahbarlari inflatsiyani jilovlashni o‘ylamagani sababli bosh vazirga 9 ta tuman-shahardagi hokim va sektor rahbarlarining lavozimiga loyiqligini ko‘rib chiqish topshirilgan.