O‘zbekistonda “Dok-1 Maks” dorisidan 65 nafar bola halok bo‘lgan

Jinoyat ishini ko‘rib chiqish bo‘yicha ochiq sud jarayonlari ertaga, 11 avgust kuni soat 10:00 da Toshkent shahar sudida boshlanadi.

Ish doirasida:

• S. R. P. (erkak, 1972 yilda Hindistonda tug‘ilgan, “Quramax Medikal” MChJ direktori),
• S.Q. (erkak, 1982 yilda Toshkent shahrida tug‘ilgan, bir vaqtda Farmatsevtika tarmog‘ini rivojlantirish agentligi direktori va uning huzuridagi “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” DUK direktori lavozimlarida ishlagan),
• va boshqalarga (jami 21 kishi: “Quramax Medikal” MChJ va “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” DUK mas’ul xodimlari) ayblov e’lon qilingan.

Ayblanuvchilarning 16 nafari erkak va 5 nafari ayol bo‘lib, ularning 7 tasiga “qamoqqa olish”, 12 tasiga “munosib xulq-atvorda bo‘lish to‘g‘risida tilxat” va 2 tasiga “garov” tarzidagi ehtiyot choralari qo‘llangan.

Ular Jinoyat kodeksining 184, 28,186-3, 186-3, 25,205, 205, 207, 28,209, 209, 210, 211, 212, 228-moddalarida nazarda tutilgan jinoyatlarni sodir etganlikda ayblanmoqda.

Eslatib o‘tamiz, o‘tgan yili dekabr oyi holatiga qurbonlar soni 20 nafardan ortiq ekani ma’lum edi.

Sog‘liqni saqlash vazirligiga ko‘ra, yo‘talga qarshi “Dok-1 Maks” va “Ambronol” siroplari tarkibida mumkin bo‘lmagan miqdordagi etilenglikol va/yoki dietilenglikol zaharli moddalari aniqlangan.

Bu preparatlarni Hindistonning “Marion Biotech” kompaniyasi ishlab chiqargan, O‘zbekistonga “Quramax” kompaniyasi import qilib kelgan. O‘nlab bolalar o‘limidan keyin, mamlakatda “Quramax” olib kirayotgan dorilarning hammasi sotuvi taqiqlandi. Hindiston rasmiylari esa “Marion Biotech”ning litsenziyasini to‘xtatdi.

Avvalroq Kun.uz bu dorilar O‘zbekistonga qanday kirib kelganini o‘rgangan edi. Qonunchilikka ko‘ra, dori vositalari, tibbiy buyumlar va tibbiy texnikani davlat ro‘yxatidan o‘tkazish, sifat nazorati, standartlashtirish va sertifikatlashtirish bo‘yicha vakolatli organ SSV huzuridagi Farmatsevtika tarmog‘ini rivojlantirish agentligi hisoblanadi. Agentlikning bu yo‘nalishdagi ishchi organi – Dori vositalari, tibbiy buyumlar va tibbiy texnika ekspertizasi va standartlashtirish davlat markazidir.

Amaldagi tartibga binoan, O‘zbekistonda ro‘yxatga olingan va import qilingan dorilarning har bir partiyasi yoki seriyasi muvofiqlik sertifikatini olishi kerak. Sertifikati bo‘lmagan dori vositalari bojxonadan o‘tkazilmaydi. Dori vositalarini sertifikatlash bilan akkreditatsiyaga ega jami 7ta tashkilot shug‘ullanadi, shundan 6 tasi Farmatsevtika agentligi tizimiga kiradi. “Dok-1 Maks” siropining 2022 yilda respublikaga olib kirilgan 11 ta seriyasidan barchasiga agentlik tizimidagi “Dori vositalarini standartlash ilmiy markazi” MChJ sertifikat bergan. Bu MChJning ikki mansabdori birinchilardan bo‘lib qamoqqa olingan edi.

E’tiborlisi, “Dok-1 Maks”ga 2022 yildan avvalgi oxirgi sertifikat 2018 yilda rasmiylashtirilgan. Ya’ni orada 4 yil bu dorining yangi seriyasi O‘zbekistonga olib kirilmagan. 2022 yilda esa 5 sentabrdan 13 dekabrgacha bo‘lgan oraliqda preparatning 11 ta seriyasiga sertifikat berilgan. Samarqand viloyati bolalar ko‘p tarmoqli tibbiyot markazining 15 dekabrdagi xatida “Dok-1 Maks” bilan bog‘liq fojiaviy holatlar “oxirgi 2 oyda” ro‘y berayotgani qayd etilgandi.