“Газ яна портлади” – “М-25” конида “водород сулфидининг назорат остидаги отилиши” рўй берди

Бойсундаги “Мустақилликнинг 25 йиллиги” газ конида такрорий портлаш юз берди. Маҳаллий аҳолига кўра, воқеа коннинг аввалроқ аварияга учраган ҳудудида эмас, янги бурғиланган қудуқда юзага келган. Энергетика вазирлиги буни “водород сулфидининг назорат остидаги отилиши” деб атамоқда, аммо нима сабаб содир бўлганидан бехабар. Ҳозирда табиатга зарар етказмаслик учун қудуқ ёқиб қўйилган, ҳодиса оқибатида ҳеч ким жабрланмагани айтилди.

Сурхондарёнинг Бойсундаги “Мустақилликнинг 25 йиллиги” газ конидаги авария яна кун тартибига қайтди. 2025 йилнинг 27 март куни “М-25” газ конидаги 202-сонли қудуқда навбатдаги портлаш содир бўлди.

Kun.uz’га ҳодиса ҳақида қисқача маълумот берган фуқарога кўра, ҳолат коннинг аввалроқ аварияга учраган қудуқларида эмас, бошқа жойида юзага келган.

“Биз Кофрундамиз, олдинги газ ёнган тараф бу [бошқа] томонда эди, ҳозир бошқа жойдан яна ёняпти… Газ яна портлади. Янги бурғилаш жойида яна газ портлади”, – дейилади ҳамюртимиз жўнатган видеода.

Энергетика вазирлиги буни “водород сулфидининг назорат остидаги отилиши” деб атаган. Аммо расмийлар “назоратли отилиш”нинг сабабларидан бехабар. Нохуш вазият ва ёнғиннинг келиб чиқиш сабаблари ўрганилиб, қўшимча маълумот берилиши кутилмоқда.

Шу ерда мантиқ йўқолади, қандай қилиб сабаблари аниқланиши кутилаётган жараёнда “назорат остидаги отилиш юзага келган” дейиш мумкин?

Қайд этилишича, табиатга зиён етказмаслик ва ҳаво ифлосланишининг олдини олиш мақсадида ҳозирда 202-сонли қудуқ ёпиб қўйилган. Ҳодиса оқибатида ҳеч ким жабрланмаган. Воқеа жойига зудлик билан Фавқулодда вазиятлар вазирлиги бригадаси етиб борган.

Ишларни ташкил этиш мақсадида Энергетика вазирлиги ҳамда бошқа мутасадди ташкилотлар таркибида ташкил этилган махсус штаб вакиллари ҳам ҳодиса жойига етиб келган.

“Айни пайтда керакли барча чора-тадбирлар зарур техника ҳамда ускуналардан самарали фойдаланилган ҳолда олиб борилмоқда. Шунингдек, хавфсизликни таъминлаш бўйича кучайтирилган чоралар кўрилмоқда.

Алоҳида таъкидлаш лозимки, юзага келган мазкур ҳолат аҳоли ва яқин атрофдаги ҳудудларга ҳеч қандай хавф туғдирмайди. Жараён Фавқулодда вазиятлар вазирлиги, “Саноатконтехназорат” давлат инспекцияси ҳамда Очиқ нефт ва газ фаввораларининг олдини олиш ва бартараф этиш бўйича Ўзбекистон ҳарбийлаштирилган қисми мутахассислари томонидан тўлиқ назорат остига олинган”, – дейилади расмий хабарда.

Эслатиб ўтамиз, “Мустақилликнинг 25 йиллиги” конидаги дастлабки авария 2024 йил 1 сентябр куни содир бўлганди. Ўшанда “Кўлқамиш” МФЙ ҳудудида жойлашган 604-сонли қудуғида бурғилаш ишлари олиб борилаётган пайтда технологик жараён бузилиб, водород сулфид гази чиқиши кузатилган.

2024 йил 17 сентябр куни яна портлаш бўлган, 604-сонли қудуқнинг ён тарафидан юқори босимли водород сулфид гази сизиб чиққан. Оқибатда 4 киши вафот этган, 11 киши жароҳатланганди. Энергетика вазири Жўрабек Мирзамаҳмудов вафот этганларнинг оиласи пудратчи ташкилот томонидан оталиққа олинишини билдирган, аммо бу борада нималар қилингани маълум эмас.

Маълумот учун, бир муддат аввал кон атрофи “оловли водий”га айланиб қолгани хабар қилинганди. Энди Бойсун аввалгидек энг сўлим шаҳар бўлолмайди. Аммо шу кетишда Туркманистоннинг улкан газ конидаги сайёҳлар учун экскурсия майдони – “Дўзах дарвозалари”га айланиши мумкин.