Kun.uz мухбирлари аҳолида туғилган саволларга жавоб олиш ва вазиятга аниқлик киритиш учун пойтахтдаги икки энг йирик чакана савдо тармоқлари – Korzinka ва Makro раҳбарлари билан суҳбатлашди.
Зафар Ҳошимов: «Маҳсулотлар етишмовчилиги ёки дўконлар ёпилиб қолишидан хавотир олишга асос йўқ»
«Харидорлар бироз кўпайиб, навбатлар пайдо бўлгани рост. Лекин ҳамма маҳсулотлар етарли. Навбатда турганларнинг кўпи билан гаплашиб, нима сабабдан бунақа кўп маҳсулот оляпсиз, дея сўрадим. Улар кўп одам йиғиладиган жойлар ёпилади, дейилгани учун, бозор ва дўконлар ҳам ёпилади, деб тушунишган.
Одамлар дўкон ва бозорлар ёпилиб қолиши эҳтимолини ўйлаб, узоқ вақт сақласа бўладиган шакар, ун, гуруч, гречка, макарон, ёғ, консерва маҳсулотлари, ҳар хил дезинфекция воситалари, совун кўп харид қилишди», – дейди Зафар Ҳошимов.
Тадбиркорнинг маълум қилишича, у раҳбарлик қилаётган супермаркетлар тармоғи сўнгги ҳафталар давомида маҳсулотлар захирасини бир неча баробарга кўпайтирган.
«Шунинг учун ҳеч қанақа ваҳимага ўрин йўқ. Мамлакатимиз карантинга ёпилган бўлса ҳам, маҳсулотлар келишига ҳеч қандай тўсиқ йўқ. На маҳсулотлар етишмовчилигидан ва на дўконлар ёпилиб қолишидан хавфсирашга ўрин йўқ», – дейди у.
Талабнинг ошгани маҳсулот нархига таъсир этмайдими, деган саволга жавобан Ҳошимов шунга яраша таклиф ҳам етарли эканини айтди.
«Таклиф борасида ҳеч қанақа муаммо йўқ. Талаб етарли даражада қондириляпти. Бугунги кундаги ҳолат ва захираларимиздан келиб чиқиб, асосий озиқ-овқат маҳсулотлари нархи шу кунларда кескин ошиши имконсиз, деб ҳисоблайман», – деди Зафар Ҳошимов.
Коронавирус дарагини эшитган Самарқанд: харидлар ошган, маҳсулотлар етарли, одамлар хотиржам
