Интернетда қувалик собиқ профилактика инспектори Нозимжон Нишоновнинг навбатдаги видеомурожаати тарқалди. Видеода Қува тумани ички ишлар бўлими раҳбарларидан бири унга куракда турмайдиган сўзлар билан муомалада бўлгани, ҳақорат ва таҳдид қилгани эшитилади.
Видео муаллифи Қува тумани Ички ишлар бўлимида раҳбарият ходимлар билан қўпол муомалада бўлиши, шахсий таркиб олдида ҳақоратли сўзларни бемалол ишлатишини айтиб, сўзларини тасдиқловчи аудиоёзувни қўйиб эшиттиради.
«Нозиммиди отинг? Пулим йўқ деяпсанми, «одолжение» қилиб манга. Йигирмата сенга ўхшаган Нозимни с***б юбораман, тушундингми, қўлимдан келади. Эркатойлигингни уйингдагиларга қиласан, қариндошларингга қиласан. Синфдошларингга қиласан. Бу эркатойлигингни ман кўтармайман.
Чийиллаб қочворадигон қивораман сани бу идорадан. Қочиб умуман кўринмайдигон бўлиб кетасан. Ўзи санга ўхшаган битта-иккита жинни қўйларни эртага раҳбар тайинланса кириб таклифини бераман. Ўзи ман тўлиб ётибман. Мана бўлинма бошлиқлари бор, ёмонлашмас, «реалный» тасдиқлаб бераман. «Реалный» манави ишни бунақа-бунақа қилиш керак, бошлиқ, мана бу ишни бунақа қилиш керак. Манави ***ни **** керак дейман. Ман «любой ходи»га ишим билан раҳбар билан яхши бўлиб оламан», дейди аудиода гапирган эркак.
Собиқ инспектор Нозимжон Нишоновнинг Kun.uz’га маълум қилишича, овоз эгаси Қува туман ИИБ бошлиғи ўринбосари майор Азиз Аҳмаджоновдир.
Ички ишлар вазири матбуот котиби Шоҳрух Ғиёсов Нозимжон Нишоновнинг янги видеомурожаатига илова қилинган, жумладан, Қува тумани ички ишлар бўлими раҳбариятининг ходимларни ҳақорат қилгани акс этган аудиоёзувлардан хабардор эканини маълум қилди.
«Бу аудиоёзувлардан хабаримиз бор. Тақдим қилинган бизга. Ҳозирги вақтда ИИВ Шахсий хавфсизлик хизмати бу масала бўйича текширув ўтказмоқда. Тегишли хулоса қилинади ва бу ҳолат бўйича албатта жамоатчиликка ахборот берилади», деди у.
Собиқ инспектор Қува туман ИИБ бошлиғининг ўринбосари устидан арз қилди
