Айниқса ўтган 2022 йилда бундай воқеалар жуда кўпайган туюлди. Йил бошида Тошкент ҳайвонот боғида бир аёл ўз қизини айиқ олдига ташлаб юборди. Охиргиси Самарқандда аёл чет давлатдаги эрига жаҳл қилиб, боласини уриб видео олган ва уни эрига жўнатгани бўлди.
Ҳеч бир аёл ўз-ўзидан фарзандини бу ҳолга солмайди
Раъно Турдибоева, Оила ва хотин-қизлар қўмитаси раиси ўринбосари:
— Дарҳақиқат, бу ҳолатлар аёлларнинг кайфиятини билдиради. Бундай ҳолатлар ўнлаб учрайди. Биз ҳар бир ҳолатни ўрганиб кўрганимизда, сабаблар аёлнинг атрофидаги муҳитга тақаляпти. Ҳеч ким ўз-ўзидан фарзандини ёки ўзини бу ҳолга солмайди.
Шундай оилалар борки, бир қараганда, муаммоси йўқдек кўринади. Аммо аёлнинг ичида йиғилиб қолган муаммолар бўлади ва бир куни портлайди. Портлагач, у ўзининг бошқалар олдида ожизлигини ҳис қилади ва фақат боласига кучи етади, оқибатда бутун жамиятга бўлган аламини фарзандидан олади. Охирги бўлган Самарқанддаги ҳолатда ҳам ҳали ёш қизнинг тўртта, эрининг олдинги турмушидан фарзанди билан ҳисобланса бешта фарзанди бор, бу дегани у мактабни битирибоқ турмушга чиққан. Бирор касби йўқ. Шу ҳолатда эрига қарам, чидашга мажбур. Ажрашиб кетса, болаларини қандай боқишни ўйлайди. Шунинг учун ҳам аёллар бу нохуш ҳолатларни охирги ечим деб биляпти.
Шу ўринда бир статистикани айтиб ўтмоқчиман. Вояга етмаган, яъни ўн саккиз ёшга тўлмаган қизларга нисбатан зўравонлик қилиш ҳолати 456 тани ташкил этади. Шуларнинг ярмидан кўпи эса оилавий зўравонлик. Бу маълумот қайд этилгани, холос, қанчадан қанчаси қайд этилмаган.
Баҳодир Қаҳҳоров, Оила ва хотин-қизлар қўмитаси бўлим бошлиғи:
— Жиноят қилган инсонга жазо бор, албатта. Бу вазиятларда барча аёллар қонун доирасида жазоланган. Улардан қолган фарзандларига нисбатан қонун томондан йўналишлар белгиланган: яқин қариндошлар васийлигига ўтиши ёки васий тайинланиши. Мактаб ёшидаги бола бўлса, у билан мактаб психологи, мактаб ёшига етмаган бўлса, шифохоналардаги психологлар у билан шуғулланиши белгиланган.
