Ўзбекистон Осиё ўйинларида илк олтин медални қўлга киритди
Ўзбекистон спортчилари Японияда бўлиб ўтаётган Осиё ўйинларида дастлабки олтин медалга сазовор бўлди.
21 сентябр куни карате бўйича баҳсларда -67 кг вазн тоифасида иштирок этган Абдулваҳоб Рашидов чемпионга айланди. У финалда мезбонлар вакили Юго Козакидан устун келди (7:5).
Натижада Ўзбекистон спортчилари битта олтин, битта кумуш ва битта бронза билан кучли ўнликка кириб олди. Аввалроқ, карате бўйича -55 кг вазн тоифаси вакили Ҳумоюнмирзо Ҳалимов кумуш медални, аралаш жанг санъатининг модерн йўналишида -71 кг вазн тоифасида Нодирбек Шавкатов бронза олган эди.
Тошкентда банк омонати билан боғлиқ йирик талон-торож ҳолати фош этилди
Бош прокуратура ҳузуридаги Иқтисодий жиноятларга қарши курашиш департаментининг Сергели тумани бўлими тижорат банкларидан биридаги йирик миқдордаги талон-торож ҳолатини аниқлади.
Департамент маълумотига кўра, терговга қадар текширув давомида банкнинг масъул шахслари фуқаро И.М. томонидан омонатга қўйилган 500 минг АҚШ долларининг 300 минг долларини ўзлаштирган. Улар омонат эгаси номидан қалбаки ариза ва бошқа ҳужжатлар расмийлаштирган.
Ҳолат юзасидан Жиноят кодексининг 167-моддаси (Ўзлаштириш ёки растрата йўли билан талон-торож қилиш) ҳамда 228-моддаси (Ҳужжатлар, штамплар, муҳрлар ва бланкаларни қалбакилаштириш ёки улардан фойдаланиш) билан жиноят иши қўзғатилди.
Дубайдан қарийб 1,3 млрд сўмлик олтин буюмни олиб киришга уринган шахс ушланди
Тошкент халқаро аэропортида Дубайдан келган йўловчининг юкидан декларацияда кўрсатилмаган, қиймати қарийб 1,3 млрд сўмлик заргарлик буюмлари ва олтин қуймалари аниқланди. Божхона назорати вақтида фуқаронинг юки орасидан соф оғирлиги 921,37 грамм бўлган 141 дона заргарлик буюми ҳамда учта олтин қуймаси топилган.
