«Vaqtning bir daqiqasini ham bekor oʻtkazmang» - prezident yoshlarga oʻgit berdi. Samarqandda Butunjahon shaxmat olimpiadasi boshlandi. Tibbiyotda 6 yillik bakalavriat yoʻnalishi joriy etiladi. Xorazmda chiqindidan elektr energiyasi ishlab chiqariladi. Sirdaryoda bankomatni bolta bilan ochmoqchi boʻlgan yigit qoʻlga olindi. Kunning muhim yangiliklari bilan tanishtiramiz.
«Vaqtning bir daqiqasini ham bekor oʻtkazmang» - prezident yoshlarga oʻgit berdi
Shavkat Mirziyoyevning Janubiy Koreyaga tashrifi davomida, Seul Toshkentdan toʻrt soat oldinda boʻlgani uchun davlat rahbarining ish kuni tonggi soat 4:00 da boshlanayotgani maʼlum boʻldi.
«…Men mashinada koʻp yuraman, koʻchada bir-biri bilan muloqot qilib ketayotgan yoshlarni koʻrib oʻylayman: qani endi ular eng baxtli kunlari shu ekanini bilsalar… Bilasizlarmi, prezident boʻlib meni nima qiynaydi? Menga vaqt yetmaydi!» - dedi prezident Seulda vatandoshlar bilan muloqotda.
«Bir daqiqa vaqtni ham bekorga oʻtkazmang. 5 yil oʻtadi, 10-15 yil oʻtadi. Kim boshqaradi Oʻzbekistonni? Sizlar. Toʻgʻri, sogʻinch qiynaydi. Vatan sogʻinchi alamida koʻproq ilm olinglar, vatanga sadoqat bilan xizmat qilinglar», deb qoʻshimcha qildi davlat rahbari.
Prezident ularga tashrif tafsilotlarini tushuntirdi, nega Janubiy Koreyaga kelgani, munosabatlar qanday rivojlanib borayotgani, shu yerdagi fuqarolarga qanday koʻmak berish mumkinligi haqida suhbatlashdi, yoshlarning takliflarini tingladi.
Samarqandda Butunjahon shaxmat olimpiadasi boshlandi
Samarqandda shaxmat tarixidagi eng yirik jamoaviy turnir - 46-Butunjahon shaxmat olimpiadasining tantanali ochilish marosimi boʻlib oʻtdi. Musobaqada butun dunyodan rekord hisobdagi 398 ta jamoa, 1974 nafar shaxmatchi va 240 nafar grossmeyster ishtirok etadi.
Ayollar oʻrtasidagi turnirda amaldagi chempion - eng kuchli tarkibda kelgan Hindiston terma jamoasi oltin medalga asosiy daʼvogar hisoblanadi. Erkaklar turnirida AQSH terma jamoasi birinchi boshlangʻich raqamni oldi. Ikkinchi oʻrinda - tarkibida hozirgi shaxmat qiroli Gukesh Dommaraju ishtirok etayotgan 2024-yilgi chempion Hindiston terma jamoasi. Uchinchi raqam - turnir mezboni, Javohir Sindarov boshchiligidagi Oʻzbekiston terma jamoasiga tegishli.
Erkaklar oʻrtasidagi turnir gʻolibi Lord Frederik Gustavus Gamilton-Rassel kubogini qoʻlga kiritadi. Ayollar oʻrtasidagi turnir gʻolibi esa - Vera Menchik kubogini. Ikkala turnirda ham yakuniy oʻrinlar yigʻindisi eng kam boʻlgan mamlakat Nona Gaprindashvili kubogi bilan taqdirlanadi.
Tibbiyotda 6 yillik bakalavriat yoʻnalishi joriy etiladi
2027-2028 oʻquv yilidan Oʻzbekistonda «davolash ishi» yoʻnalishi negizida «5+1» shaklidagi 6 yillik «umumiy tibbiyot» bakalavriat yoʻnalishi joriy etiladi. Bunda bitiruvchi kurs talabalari bir oʻquv yili davomida toʻliq amaliyot oʻtaydi. Bu 10-sentabr kuni qabul qilingan «Tibbiyot va farmatsevtika sohasida kadrlar tayyorlash tizimini tubdan takomillashtirish chora-tadbirlari toʻgʻrisida»gi prezident farmonida belgilandi.
Hujjatga koʻra, 2027-2028 oʻquv yilidan tibbiyot taʼlimi sohasi uchun bakalavriat yoʻnalishlari boʻyicha ajratiladigan davlat buyurtmasi parametrlari taʼlim yoʻnalishlari kesimida Sogʻliqni saqlash vazirligi tomonidan tasdiqlanadi.
Qabul koʻrsatkichlari tibbiyot va farmatsevtika kadrlariga boʻlgan joriy va istiqboldagi ehtiyoj asosida shakllantiriladi. Bunda hududlar va tibbiyot tashkilotlarining ehtiyoji, shuningdek, muayyan mutaxassisliklar boʻyicha kadrlar yetishmovchiligi hisobga olinadi.
Xorazmda chiqindidan elektr energiyasi ishlab chiqariladi
Xorazm viloyatida qattiq maishiy chiqindilarni yoqish orqali elektr energiyasi ishlab chiqarish yoʻlga qoʻyiladi. Prezidentning shu haqdagi qaroriga koʻra, loyiha Janubiy Koreyaning Green Hammer kompaniyasi tomonidan amalga oshiriladi. Investor loyiha doirasida xorijiy korxona - loyiha kompaniyasini taʼsis etgan.
Elektr energiyasini sotib olish va qattiq maishiy chiqindilarni yetkazib berish boʻyicha tuzilgan bitimlarga muvofiq, loyiha kompaniyasi ishlab chiqarilgan elektr energiyasini 30 yil davomida «Oʻzenergosotish» AJga kafolatlangan tarzda sotadi. Kompaniya esa elektr energiyasini shu muddat davomida milliy valyutada xarid qiladi.
Shuningdek, loyiha kompaniyasi elektr stansiyasini yagona elektr tarmogʻiga ulash uchun zarur havo elektr uzatish tarmoqlari va tegishli infratuzilma obyektlarini «Oʻzbekiston milliy elektr tarmoqlari» AJ taqdim etadigan texnik shartlar asosida quradi.
Qarorga muvofiq, tegishli agentlik loyiha kompaniyasiga 30 yil davomida qattiq maishiy chiqindilarni kafolatlangan hajmda yetkazib boradi.
Sirdaryoda bankomatni bolta bilan ochmoqchi boʻlgan yigit qoʻlga olindi
Guliston tumanida bankomatdan pul oʻgʻirlamoqchi boʻlgan shaxs ushlandi. Maʼlum boʻlishicha, hodisa 12-sentabr kuni tunda Guliston tumanidagi Oltin vodiy mahallasida sodir boʻlgan. Hududdagi bankomatdan qoʻriqlash xizmati monitoring markaziga tashvish signali kelib tushgan.
Tekshiruv davomida yuzini yashirgan holda bolta va boshqa ashyolar bilan bankomatning tashqi qismini buzishga urinayotgan shaxs aniqlangan. Qoʻriqlash xizmati xodimlarini koʻrib, voqea joyidan qochishga uringan gumonlanuvchi tezkor guruh tomonidan qoʻlga olingan.
Holat yuzasidan tergov-surishtiruv ishlari oʻtkazilmoqda.
